सुर्खेत । सरकारी स्वामित्वको खाद्य व्यवस्था तथा व्यापार कम्पनीले सुर्खेतमा चाडपर्व लक्षित सुपथ मूल्य पसल सञ्चालनमा ल्याएको छ ।
सुर्खेतका निमित्त प्रमुख जिल्ला अधिकारी नारायण पाण्डे र राष्ट्रिय उपभोक्ता मञ्चका केन्द्रीय अध्यक्ष प्रेमलाल मर्हजनले आइतबार संयुक्तरुपमा सुपथ मूल्य पसलको उद्घाटन गरेका हुन् । उद्घाटन कार्यक्रममा बोल्दै मञ्चका अध्यक्ष मर्हजनले आम उपभोक्ताका लागि सरकारले चाडपर्व लक्षित गरेर सञ्चालनमा ल्याएको सुपथ पसलबाट अधिकतम् लाभ लिन आग्रह गरे ।
उनले सरकारी स्तरबाट सञ्चालित सुपथ मूल्य पसलमा गुणस्तरीयताको सुनिश्चितता हुने भएकाले कुनैपनि वस्तु खरिद गर्दा विल लिएर ढुक्कले उपभोग गर्न सुझाव दिए । कार्यक्रममा सुर्खेतका निमित्र प्रमुख जिल्ला अधिकारी पाण्डेले सरकारले चाडपर्व लक्षित गरेर बजारमा वस्तुहरु अभाव हुन नदिने गरी सुपथ मूल्य पसलहरु सञ्चालनमा ल्याएको बताए ।
उनले चाडपर्वमा उपभोक्तालाई दैनिक उपभोग्य वस्तुको सहज र सहुलियत दरमा उपलब्ध गराउन सहुलियत पसल प्रभावकारी हुने विश्वास व्यक्त गरे । खाद्य प्रविधि तथा गुण नियन्त्रण कार्यालय सुर्खेतका प्रमुख डाक्टर क्षितिज श्रेष्ठले तोकिएको मापदण्डमा टेकेर विक्री वितरण गरिने कुनैपनि वस्तुमा प्रायः समस्या नरहेको बताए ।
उनले गुणस्तरीय वस्तुको विक्री वितरण पूर्व चेकजाँच गरी उपभोक्तालाई दिन सुझाव दिए । सुर्खेत उद्योग वाणिज्य संघका महासचिव भद्र भण्डारीले खाद्य व्यवस्था तथा व्यापार कम्पनीले चाडपर्वमा मात्र नभई बाह्रै महिना सुपथ मूल्य सञ्चालनमा ल्याउन आग्रह गरे । उनले केही दिनमै चाडपर्व लक्षित सुपथ मूल्य पसल नीजि स्तरबाट समेत सुर्खेतमा सञ्चालनमा ल्याउनका व्यवसायीहरु वीच छलफलको जनाए ।
यता खाद्य व्यवस्था तथा व्यापार कम्पनी कर्णाली प्रादेशिक कार्यालयका प्रमुख माधव मिश्रले सुर्खेतसहित ४२ जिल्लाका ७४ स्थानहरुमा सुपथ मूल्य पसल सञ्चालनमा ल्याईएको बताए । उनले आजदेखि दशै, तिहार, छठ पर्वसम्म उपभोक्तालाई दैनिक उपभोग्य वस्तुको सहज र सहुलियत दरमा उपलब्ध गराउन सुपथ मूल्य पसल सञ्चालनमा ल्याईएको जनाए ।
उनका अनुसार सहुलियत पसलमा उपभोक्ताले विभिन्न प्रकारका चामल तथा तेल, घ्यूसँगै छिट्टै चिनी तथा सिमी/गेडागुडी, फापर दाना, चिनो, कागुनो उपलब्ध गराईनेछ । कम्पनीले आठथरी पौष्टिक तत्त्व मिश्रण भएको चामल समेत विक्री गर्ने तयारी गरेको कर्णाली प्रादेशिक प्रमुख मिश्रले जानकारी दिए ।
उनले विभिन्न पौष्टिक तत्वको कमीले विशेषगरी बालबालिकामा देखिने कुपोषण, रक्तअल्पताजस्ता स्वास्थ्य समस्याबाट दिगो रुपमा छुटकारा दिलाउन यस्तो चामलको विक्री शुरु गर्न लागिएको बताए । उनका अनुसार विश्व खाद्य कार्यक्रमको सहयोगमा कम्पनीले सुर्खेत, जनकपुर, राजापुर र काठमाडौंको थापाथलीमा चामलको पौष्टिक तत्व स्तरोन्नति गर्न आवश्यक पर्ने मेशिन जडान गरेको हो ।
अब यस्तो चामल जो कोहीले पनि कम्पनीका शाखाहरुबाट किनेर उपभोग गर्न सकिने उनको भनाइ थियो । उनका अनुसार उक्त चामलमा आइरन, जिंक, भिटामिन ए, फोलिक एसिड, भिटामिन बी१२, थायमिन, नियासिन, पाइरिडक्सिनसहित शारीरिक र मानसिक स्वास्थ्यका लागि आवश्यक तत्व मिसाइएको हुन्छ ।