काठमाडौं । म्युजिक नेपालले एनसेल र न्यू आई टि भेन्चरको सहकार्यमा नेपाली गीत संगीतका पारखीहरूका एप ल्याएको छ । एण्ड्रोइड र आईओएस दुबै थरि मोबाइल फोनमा चलाउन सकिने ‘गीत’ एपको हाइपरलिंक एन्ड्रोइड र आईओएस रहेको छ ।
यस एपमार्फत प्रयोगकर्ताहरूले लोकदोहोरी, आधुनिक, पप, नेपाली चलचित्र, भाषाभाषीलगायत कुनै पनि विधामा अहिलेका चर्चित, लोकप्रिय गीतहरू मात्र नभई पुराना सदाबहार नेपाली गीतहरू पनि चौबीसै घण्टा सुन्न सक्नेछन् । आफ्नो रूचि अनुसारका गीतहरू छान्न, सूचि बनाउन र संग्रहित गर्न सकिनेछ । एपमा ८० देखि ८५ प्रतिशत नेपाली गीतसंगीत उलब्ध हुने म्युजिक नेपालका प्रमुख सन्तोष शर्माको दाबी छ । “तत्कालै नयाँ पुराना गरेर ८० देखि ८५ प्रतिशत गीत उलब्ध हुनेछन् । तर केही वर्षमा ९० देखि ९५ प्रतिशत गीत उपलब्ध गराउने हाम्रो अपेक्षा छ,” उनले भने ।
आफूले सुन्न मन पराउने गीतका बोल पनि देख्न सकिने तथा फेसबुक मार्फत साथीभाइहरूसँग शेयर गर्न सकिने प्रावधान पनि एपमा रहेको छ । साथै अफलाइन सुन्न सकिने छ । यो एपमार्फत सर्जकहरु असंख्य श्रोताहरु माझ पुग्न सक्ने र श्रोताहरूले पनि आफ्नो रोजाइका कलाकार र उनीहरूका नयाँ गीतहरू निर्विध्न रुपमा सुन्न सक्ने बताइएको छ । विश्वका अरु थुप्रै मुलुकका कलाकारहरूले व्यावसायिक रुपमा उठाइरहेको फाइदा अब म्यूजिक नेपालको माध्यमबाट एनसेल मार्फत नेपाली स्रष्टा कलाकारहरुले पनि उठाउन सक्ने भएको हुनाले यसलाई एउटा महत्वपूर्ण उपलब्धि मान्न सकिने म्यूजिक नेपालले जनाएको छ ।
दसैं, तिहार तथा छठ पर्वको उपलक्ष्यमा एक महिनासम्म निशुल्क गरिएको यस एप एनसेलका वर्तमान अवस्थामा भएका करिब १ करोड ६३ लाख ग्राहकहरुका लागि मात्र उपलब्ध गराइएको छ । यस एपले नेपाली मोबाइल प्रयोगकर्ताहरूलाई पनि सङ्गीत सुन्ने नयाँ र सुखद अनुभवसँग परिचित गराउने छ ।
एन्ड्रोइड फोनका लागि प्ले स्टोरमा गएर गीत सर्च गरी डाउनलोड र आइओएसको लागि एप स्टोरमा गएर गीत सर्च गरी डाउनलोड गर्नुपर्ने हुन्छ । एनसेलका कुनै पनि ग्राहकले यो एप डाउनलोड गर्ना साथ ३० दिनको लागि निःशुल्क प्रिमियम सेवा उपभोग गर्न सक्नेछन् । डाउनलोड गरेको एप खोलेर आफ्नो एनसेलको मोबाइल नम्बर हाल्ना साथ प्राप्त हुने पिन नम्बरलाई भेरिफाइ गरेर एक दिन, सात दिन वा ३० दिनको योजना छान्नुपर्ने हुन्छ । एप डाउनलोड गर्दा कुनै शुल्क लाग्नेछैन । तर डेटाको शुल्क भने प्रयोगकर्ताको योजना अनुसारको लाग्न सक्नेछ । एप प्रयोग गरेको पहिलो ३० दिन कुनै शुल्क लाग्दैन । त्यसपछि प्रति दिन तीन रुपैंयाँ, प्रति हप्ता १५ रुपैयाँ वा प्रति महिना ५० (कर बाहेक)मा चाहेको सङ्गीत सुन्न सकिनेछ ।
क्यासेट तथा सीडीको समय फेज आउट भएसँगै अब एपलाई नै व्यवसायिक बनाउनुको विकल्प नरहेको शर्माको भनाइ छ । सांगीतिक उद्योगलाई थप व्यवसायिक बनाउँदै आम्दानीको स्रोतको मुख्य माध्यम डिजिटल प्रविधिलाई बनाउने उद्देश्यले गीत एप लञ्च गरेको शर्मा बताउँछन् ।