एजेन्सी। कोरोनाका कारण गएको ६ महिनादेखि बन्द रहेका भारतका सिनेमा हल अब खुल्ने भएका छन् ।
भारत सरकारले निर्देशिकाभित्र रहेर १५ अक्टोबरबाट सिनेमा हल खोल्न अनुमति दिएको छ । तर, ५० प्रतिशत दर्शक राखेर मात्र फिल्म देखाउनु पर्नेछ । सरकारले सिनेमा हल सञ्चालनको अनुमति दिएपछि अब कुन फिल्म सबैभन्दा पहिला रिलिज हुन्छ भन्ने प्रश्न उब्जिएको छ ।
पिंकविलाको एक रिपोर्ट अनुसार, अभिनेत्री कियारा आडवाणी अभिनीत फिल्म ‘इन्दूकी जवानी’ सिनेमा हल खुलेपछि सबैभन्दा पहिला रिलिज हुनेछ । यद्यपि, निर्माण टिमले यस विषयमा आधिकारिक जानकारी भने दिएको छैन । निर्माता निखिल आडवाणीले यो फिल्म अहिलेसम्म कुनै अनलाइन प्लटेफर्मलाई बेचेका छैनन् । न त उनी कुनै प्रकारको सम्झौतामा नै बाँधिएका छन् ।
निखिल सिनेमा हल खुलेपछि ‘इन्दूकी जवानी’ प्रदर्शन गर्न तयार रहेको भारतीय मिडियाले बताएका छन् । सानो लगानीमा बनेका कारण यो फिल्मले लगानी उठाइसकेको छ । जसले गर्दा ५० प्रतिशत दर्शक राखेर प्रदर्शन गर्दा पनि फिल्मलाई असर पर्दैन । फिल्मलाई अबीर सेनगुप्ताले निर्देशन गरेका हुन् । कियारा फिल्ममा निर्वाह गरेको भूमिकालाई लिएर निकै उत्साहित छिन् ।