काठमाडाैं । फिल्म ‘चपली हाइट २’ बाट अभिनेत्रीको रुपमा डेब्यू गरेकी परमिता आरएल राणा शुक्रवारबाट २७ वर्षकी भएकी छन् ।
२०५० साल असोज १६ गते ललितपुरमा जन्मिएकी उनलाई सामाजिक सञ्जालको माध्यमबाट फिल्मकर्मी तथा दर्शकहरुले जन्मदिनको शुभकामना दिइरहेका छन् । बोल्ड अभिनेत्रीको छवि बनाएकी उनले यसपालीको जन्मदिन बालबालिकाहरुसँग मनाएकी छन् । पखोला गाउँमा अवस्थित श्रीकाली देवी माध्यामिक विद्यालयमा अध्ययन गर्ने आर्थिक अवस्था कमजोर भएका विद्यार्थीहरुलाई अभिनेत्री राणाले जन्मदिनको अवसरमा शैक्षिक सामाग्री र जाडोका लागि न्यानो कपडा बाँडेकी छन् ।
उनले बालबालिकालाई सहयोग गर्न पाएकोमा खुसी व्यक्त गर्दै प्रत्येक वर्ष यसरी नै बालबालिकासँग आफ्नो जन्मदिनको खुसी साट्ने बताएकी छन् । उनले सामाजिक सञ्जालमा लेखेकी छन्, ‘मैले पछिल्ला केही महिनाहरूमा भौतिकवादी चिजहरूले दिने खुशी क्षणिक रहेछन् भन्ने कुरा महसुस गरें । र, आखिरमा हाम्रो जीवनमा यसले केही महत्व नै राख्दैन । मरेर लानु केही छैन, सकेसम्म अरुलाई सहयोग गर्नुपर्छ । सेवा नै सबैभन्दा ठुलो धर्म हो ।’ उनले आफू जीवनको उद्येश्य भेटाउन त्यसतर्फ लम्किरहेको पनि उल्लेख गरेकी छन् ।
अभिनयमा आफूलाई प्रमाणित गरिसकेकी परमिताको फिल्मी करिअर भने सुखद छैन । ‘चपली हाइट २’ पछि उनले ‘चंगा चेट, रोज र दि कर्मा’ फिल्ममा काम गरिन् । तर, कुनैले उनको करिअरलाई उचाइ दिलाउन सकेन । अहिले उनी एक हिट फिल्मको पखाईमा छिन् । आफूलाई गायिकाको रुपमा पनि उभ्याइसकेकी उनी लभ लाइभका कारण प्रायः चर्चामा छाइरहेकी हुन्छिन् ।