सुर्खेत । कालीकोट जिल्लाको सान्नी त्रिवेणी गाउँपालिका–१, सेरीज्यूलामा रहेको शंकर माध्यमिक विद्यालयका बालकक्षादेखि कक्षा ५ कक्षासम्मका विद्यार्थी खुल्ला चौरमा बसेर पढ्न बाध्य भएका छन् । विद्यालयको कक्षा कोठाभित्र आवश्यक मात्रामा बेन्च–डेस्कको व्यवस्था नहुँदा विद्यार्थीहरू खाली चौरमा बसेर पढ्न बाध्य भएका हुन् ।
कोरोना भाइरस संक्रमण हुनुभन्दा पहिले विद्यालयमा कार्पेटमा बसेर पढ्न पाएका विद्यार्थीहरूले विद्यालयलाई आइसोलेसनमा परिणत गरिएपछि त्यहाँ रहेका कार्पेट तथा डेस्क बेन्चहरू भाँचिएका कारण चिसो मौसममा भुइँमा बसेर पढ्न विद्यार्थीहरू बाध्य छन् ।
लामो समयपछि विद्यालय संचालनमा आएको र विद्यार्थीहरू अहिले खुल्ला चौरमा धुलोमा बसेर पढ्न बाध्य भएकाे शंकर माध्यमिक विद्यालयका शिक्षक खेमराज गिरीले बताए । उनले भने, ‘पहिले कार्पेट विछ्याएको भए पनि विद्यालयलाई आइसोलेसन बनाएपछि अहिलेसम्म पनि विद्यार्थीले कार्पेट पाएकोे छैनन् ।’ उनले थपे, ‘विद्यार्थीको पढाई सहजताका लागि गाउँपालिकामा निवेदन दिएको भए पनि गाउँपालिकाले कुनै वास्ता गरेको छैन् ।’
शिक्षक गिरीका अनुसार बालकक्षादेखि ५ कक्षाका विद्यार्थीहरूका लागि तत्काल बेन्च–डेस्कको आवश्यकता नभए पनि कक्षाकोठामा कार्पेटको व्यवस्थापनका लागि आफू लागिपरेको तर प्रयास सफल हुन नसकेको बताए । ‘भुइँमा राखेर बालबालिकालाई पढाउनु बाध्यता छ,’ उनले भने, ‘विद्यालयलाई आइसोले;न बनाएपछि त्यहाँ कार्पेट पनि हराए । गाउँपालिकाले अर्को व्यवस्था गरेको छैन । बाध्य भएर विद्यार्थीलाई धुलो, माटोमा राखेर पढाउनुपरेको हो ।’
