सुर्खेत । कर्णाली प्रदेशका आर्थिक मामिला तथा योजना मन्त्री प्रकाश ज्वालाले सरकारी बैंकले तल्लो वर्गका नागरिकको जीवनस्तर उकास्ने खालका कर्जा प्रवाह गर्न सुझाव दिएका छन् ।
आइतवार सुर्खेतको वीरेन्द्रनगरमा राष्ट्रिय वाणिज्य बैंको नयाँ शाखा कार्यालय उद्घाटन गर्दे मन्त्री ज्वालाले सबै क्षेत्रबाट पछाडी परेको कर्णाली प्रदेशको समृद्धिका लागि सरकारी, निजी बैंक तथा वित्तीय संस्थाहरुको पहुँच वृद्धि बढेसँगै आर्थिक गतिशीलता बढ्ने बताए ।
उनले नाफा कमाउनेमा मात्र नभई विश्वासिलो र भरपर्दो सेवा दिनेतर्फ समेत बैंकको बढी ध्यान जान आवश्यक रहेको औंल्याए । ‘उत्पादन र उद्योग क्षेत्रका साना व्यवसायीलाई पनि प्राथमिकतामा राखेर ऋण प्रवाह गर्नुहोस,’ उनले भने, ‘जोखिम क्षेत्रमा लगानी नगर्ने परिपाटीको अन्त्य गर्दै नागरिकको जीवनस्तर माथि उकास्ने खालका कार्य राष्ट्रिय वाणिज्य बैंकबाटै शुरुवात गर्न आवश्यक छ ।’
ग्राहकको अत्याधिक चाप बढेपछि कर्णाली प्रदेशको राजधानी सुर्खेतको वीरेन्द्रनगरमा बैंकले आइतवारदेखि दोस्रो शाखा सञ्चालनमा ल्याएको हो । कर्णाली प्रदेशमा उक्त बैंकको यो १९ औं शाखा हो भने देशभर उक्त बैंकको २४१ ओटा शाखा पुगेको छ ।
बैंकमा लकरसहितको सुविधासमेत रहेको जानकारी गराउँदै राष्ट्रिय वाणिज्य बैंक कर्णाली प्रदेश प्रमुख रामबहादुर थापाले अन्य बैंकको तुलनामा उत्कृष्ट, प्रभावकारी र जनमैत्री सेवा प्रवाह हुनेमा विश्वस्त रहन आग्रह गरे ।
कार्यक्रममा राष्ट्र बैंक कर्णाली प्रमुख डा शालिकराम पोखरेल, सुर्खेत शाखाका प्रमुख लिलाराम ढुंगाना, वीरेन्द्रनगर शाखाका प्रमुख जयप्रकाश बराल लगायतको उपस्थिति थियो ।
