काठमाडौं । डाक्टर गोविन्द केसीका तर्फबाट बनेको वार्ता टोली र सरकारी वार्ता टोलीबीच वार्ता सुरु भएको छ।
डा. केसीका सहयोगी प्रितम सुवेदीका अनुसार वार्ता शिक्षा मन्त्रालयमा केहीबेर अघि सुरु भएको हो।
डा. केसी विभिन्न ६ बुँदे माग राख्दै २५ दिनदेखि आमरण अनसनमा छन्। डा. केसीको अनसनप्रति वेवास्ता गर्दै आएको सरकारले सर्वत्र दवाव भएपछि बुधबार २४ औं दिनमा तीन सदस्यीय वार्ता टोली गठन गरेको थियो।
सरकारले शिक्षा मन्त्रालयका सचिव गोपीनाथ मैनालीको अध्यक्षतामा तीन सदस्यीय वार्ता टोली बनाएको हो।
उक्त वार्ता टोलीमा स्वास्थ्य मन्त्रालयका सहसचिव डा गुणराज लोहनी र चिकित्सा शिक्षा आयोगका निर्देशक डा दिलिप शर्मा छन्।
डा. केसीका तर्फबाट डा. जीवन क्षेत्रीको संयोजकत्वमा चार सदस्यीय वार्ता टोली गठन भएको थियो। वार्ता टोलीका सदस्यहरूमा नेपाल चिकित्सक संघका पूर्व अध्यक्ष डा. अञ्जनीकुमार झा, संघका वर्तमान अध्यक्ष डा. लोचन कार्की र ओम प्रकाश अर्याल छन्।
दुवै तर्फबाट सदस्यहरुले बिहिबार डा. केसीका मागमा बुँदागत रुपमा छलफल गर्ने बताइएको छ।
कर्णाली लगायतका दुर्गमका जनताले सहज स्वास्थ्य सेवा पाउनपर्ने डा. केसीको पुरानै माग हो। उनले लगातार यो विषयलाई उठाउँदै आएका छन्।
यस पटकको अनसनमा पनि डा. केसीले कर्णाली स्वास्थ्य विज्ञान प्रतिष्ठानमा तत्कालै र गेटा मेडिकल कलेज तथा राप्ती स्वास्थ्य विज्ञान प्रतिष्ठानमा पनि शीघ्र पठनपाठन सुरु गर्न माग गरेका छन्।
साथै सरकारसँग विगतमा भएका सहमति अनुसार देशका विभिन्न ठाउँमा सरकारी मेडिकल कलेज खोल्ने प्रक्रिया अघि बढाउन उनको माग छ।
