सुर्खेत । राष्ट्रिय जनमोर्चाका महासचिव जनकराज शर्माले अहिले देखा परेको बेथिति र अराजकता संघीयताकै कारण उत्पन्न भएको बताएका छन् । राष्ट्रिय जनमोर्चा सुर्खेतले आयोजनामा विरोधसभालाई सम्बोधन गर्दै उनले यो अभिव्यक्ति दिएका हुन् ।
‘सघीयताकै कारण बेथिति जन्मिएको हो’ महासचिव शर्माले भने– ‘सघीयताले राज्यकोषको अत्यधिक आय प्रशासनिक खर्चमै गएको छ । यहाँसम्म कि विकास निर्माणका बजेटसमेत कटौती हुँदै गएको छ । अर्कातिर, प्रशासनिक खर्च सञ्चालन गर्न जनतामाथि अत्यधिक करको बोझ लादिएको छ ।’
कोराना संक्रमणको सामना तत्कालको प्राथमिक काम भएको बताउँदै उनले संघीयता खारेज गरेर त्यसबाट बचेको रकम यस महामारीको नियन्त्रणमा लगाउनुपर्ने बताए । ‘सात वटा संघीय प्रादेशिक संरचना खारेज गर्नुपर्दछस र, त्यसबाट वचत हुने सम्पूर्ण रकम कोभिड–१९ जस्तो महामारी नियन्त्रणमा लगाउनुपर्दछ’ उनले भने, ‘अहिलेको सङ्कटपूर्ण घडीमा राजनीतिक पार्टीहरूले हिम्मतका साथ सङ्घीयता खारेजी गनपर्छ ।’
कोभिड–१९ महामारी जारी रहेकै बेलामा समेत स्वास्थ्य सामग्रीमा भ्रष्टाचारको गन्ध आउनुले हाम्रो देशको शासनसत्तामा कति चरम रूपमा बेथिति र अराजकता रहेछ भन्ने पुष्टि भएको महासचिव शर्माले बताए । ‘यस्तो अमानवीय कृत्य गर्ने जोकोहीलाई तत्कालै कडा सजाय दिइनुपर्दछ ।’ उनले भने,‘भ्रष्टाचारका घटनाको तत्कालै उच्चस्तरीय छानबिन हुनुपर्छ ।’
विरोधसभामा राष्ट्रिय जनमोर्चाका केन्द्रीय सदस्य रत्नविक्रम प्यासी, राजमो कर्णाली प्रदेश समितिका कोषाध्यक्ष धनप्रसाद देवकोटा र नेकपा (मसाल) सुर्खेतका प्रतिनिधि विष्णुप्रसाद शर्माले पनि सम्बोधन गरेका थिए ।
सुर्खेतका अध्यक्ष गोविन्दप्रसाद सुवेदीको अध्यक्षतामा अगाडि बढेको सो विरोधसभाको सञ्चालन जिल्ला सचिव लालबहादुर नेपालीले र स्वागत जिल्ला उपाध्यक्ष कृष्णा रावलले गरेका थिइन् ।
अहिलेको बेथिति र अराजकता संघीयताकै कारण: महासचिव शर्मा
