सुर्खेत । कर्णाली प्रदेशको राजधानी वीरेन्द्रनगरस्थित मूलपानी चोक नजिकै बुधबार बिहान अटो दुर्घटना भयो । उक्त दुर्घटनामा ठूलो क्षति भएन । दुईजना घाइते भए । मंगलबार जिप दुर्घटना भयो । सोमबार छुट्टाछुट्टै ठाउँमा अटो रिक्सा र मोटरसाइकल दुर्घटना भए । उक्त दुर्घटनामा मानवीय क्षति नभए पनि मोटरसाइकल पूर्णरुपमा ध्वस्त भयो र अटोमा धेरै क्षति भयो ।
यति मात्र होइन पछिल्लो समय तीव्र गतिमा सवारी साधन चलाउँदा र ट्राफिक व्यवस्थापन फितलो हुँदा प्रदेश राजधानी वीरेन्द्रनगरमा दैनिक साना सवारी दुर्घटना हुँदै आएका छन् । वीरेन्द्रनगरमा करिब २५ हजारभन्दा बढी सवारी साधन गुड्छन् । यी सवारी साधनलाई सहीरुपमा व्यवस्थापन गर्न नसक्दा दैनिकजसो सवारी दुर्घटना हुने गरेको स्थानीयको भनाइ छ । ठूला दुर्घटना नभए पनि हप्तामा नगरभित्र सात/आठवटा साना दुर्घटना हुने गरेकाे समाचार नागरिक दैनिकमा प्रकाशित भएकाे छ । ‘ट्राफिक प्रहरीले सही व्यवस्थापन गर्न नसक्दा कर्णाली प्रदेशको राजधानी वीरेन्द्रनगरमा प्रायः दुर्घटना हुने गरेका छन्,’ नेपाल पत्रकार महासंघ सुर्खेत शाखाका सचिव सुदीप पुरीले भने, ‘सवारी चालकसहित ट्राफिक प्रहरीले पनि सहीरूपमा जिम्मेवारी निर्वाह गर्न नसक्दा दुर्घटना बढ्दै गएका छन् ।’ ‘यस्तो फिलतो ट्राफिक व्यवस्थापन भयो भने नगरभित्र ठूला दुर्घटना नहोलान् भन्न सकिन्न,’ उनी भन्छन्, ‘ट्राफिक प्रहरी जरिवाना असुल्नुभन्दा कारबाही गर्न लाग्नु पर्छ ।’ प्रहरीले नियम उल्लंघन गर्ने सवारी साधनलाई जरिवाना मात्र तिराउने र कार्बाही नगर्दा पनि ट्राफिक उल्लंघन बढ्दै गएको उनको भनाइ छ ।
जरिवाना असुलसँगै ट्राफिक नियम उल्लंघन गर्नेलाई कार्बाही पनि गर्नुपर्ने उनीहरू बताउँछन् ।
ट्राफिक नियम उल्लंघन गर्नेलाई ट्राफिक प्रहरीको चिनेजानेको व्यक्तिलाई नियन्त्रण नगर्दा झन् जोखिम बढ्दो छ । त्यस्ता व्यक्तिहरूले सडकमा जथाभावी सवारी साधन चलाउने गरेका छन् । वीरेन्द्रनगरमा ट्राफिक नियम कार्यान्वयन गर्नतर्फ जिम्मेवार निकाय लागेमा दुर्घटना न्यूनीकरण हुने नागरिक समाजका खिम रेग्मीले जनाए । ‘बजारमा कतिबेला त ट्राफिक प्रहरी भए नभएको अनुभूति नै हुँदैन,’ उनले भने, ‘सडकमा हिँड्दा आफैँतिर सवारी साधन ठोकिएला भन्ने डर हुन्छ ।’
बजारभित्र गति सीमित नहुँदा पनि दुर्घटना बढ्दै गएको उनको भनाइ छ ।
वीरेन्द्रनगरको तल्लो बजार (मंगलगढी–वीरेन्द्रचौक) सडक सबैभन्दा अस्तव्यस्त हुन्छ । त्यहाँ आफ्नो रुट (साइट) मा समेत सवारी साधन हिँड्दैनन् । जसले गर्दा पैदलयात्रीलाई जोखिम बढ्दै गएको वीरेन्द्रनगरका स्थानीय मनराज देवकोटा बताउँछन् । ‘ट्राफिक प्रहरीले राम्रो व्यवस्थापन गर्न नसक्दा सडक छेउछाउ हिँड्न र सडक क्रस (बाटो काट्न) गर्न ठूलो जोखिम छ,’ उनले भने, ‘यस्तो हुँदा पनि ट्राफिक प्रहरी मुखदर्शक मात्र हुन्छ ।’
उक्त सडकमा जेब्रा क्रसिङ नहुँदा पनि यात्रुलाई बाटो काट्न समस्या हुँदैन आएको छ । प्रदेश राजधानी जस्तो ठाउँमा ट्राफिक व्यवस्थापन अस्तव्यस्त हुनु ट्राफिक प्रहरीको असक्षमता भएको स्थानीय बताउँछन् ।
यता ट्राफिक प्रहरीले भने दुर्घटना न्यूनीकरणका लागि विभिन्न अभियान चलाएको बताएको छ । मंगलबारदेखि ट्राफिकले दुर्घटना न्यूनीकरण गर्न ‘चालकसँग एक मिनेट’ अभियान सञ्चालन गरेको छ । यसले दुर्घटना न्यूनीकरणमा सघाउने जिल्ला ट्राफिक प्रहरी कार्यालयले जनाएको छ ।
कर्णाली प्रदेश राजधानीमा बढ्दै सडक दुर्घटना
