काठमाडाैं। अनधिकृत रूपमा मन्त्रालयको नाम र सरकारी निशान छाप लगाएर उच्चस्तरीय राष्ट्रिय शिक्षा आयोगको प्रतिवेदन प्रकाशन गरेको भन्दै शिक्षा, विज्ञान तथा प्रविधि मन्त्रालयले शिक्षा क्षेत्रमा क्रियाशील दुई गैरसरकारी संस्थालाई कारबाही गर्ने भएको छ ।
उच्चस्तरीय आयोगले सरकारलाई बुझाएको प्रतिवेदन मन्त्रालयले शिक्षाका लागि राष्ट्रिय अभियान नेपाल (एनसीई नेपाल) र ग्लोबल एक्सन नेपालले शुक्रबार सार्वजनिक गरेपछि मन्त्रालयले आइतबार प्रेस विज्ञप्ति जारी गर्दै कारबाही गर्ने बताएको हो ।
‘उल्लेखित गैह्र-सरकारी संस्थाहरूले अनfधिकृत रूपमा यस मन्त्रालयको नाम र नेपाल सरकारको निशान छाप प्रयोग गर्नुका साथै नेपाल सरकारको प्रतिलिपि अधिकारको समेत उल्लंघन गरिएको देखिएको हुँदा यस विषयमा प्रचलित कानुनबमोजिम कारबाहीका लागि सम्बन्धित निकायमा लेखि पठाइसकिएको छ,’ मन्त्रालयका प्रवक्ता दीपक शर्माद्वारा जारी विज्ञप्तिमा भनिएको छ ।
२०७५ सालमा आयोगले बुझाएको प्रतिवेदन सरकारले गोप्य राखेपछि २५ सदस्यीय आयोगका १३ सदस्यहरूले सार्वजनिक गरेका थिए । त्यही प्रतिवेदनको प्रकाशन गरेकोभन्दै शिक्षा मन्त्रालयले एनसीई र ग्लोबल एक्सनलाई कारबाही गर्न लागेको हो ।
मन्त्रालयले ती संस्थासंग शिक्षा मन्त्रालय र मातहतका निकायले गर्दैआएको सहकार्य पनि तोडेको प्रवक्ता शर्माले जनाएका छन् । एनसीई र ग्लोबल एक्सनले आयोगका सदस्यहरूको निर्णय र स्वीकृतिमा शिक्षासम्बन्धी सार्थक बहसका लागि प्रतिवेदन प्रकाशन गरिएको जनाएका छन् ।
