सल्यान।सल्यानका चन्द्रबहादुर खड्का एक हप्तादेखि सम्पर्कविहीन भएका छन् । सल्यान कपुरकोट गाउँपालिका-६ सिनवाङ छापनेटाका ४२ वर्षीय चन्द्रबहादुर खड्का एक हप्तादेखि सम्पर्कविहीन भएको हुन् ।
१६ मंसिरमा मजदुरीको लागि भारत जान्छु भनेर हिँडेका चन्द्रबहादुर अहिलेसम्म सम्पर्कमा नआएको भन्दै खोजी गरिदिन उनकी श्रीमती रूपी खड्काले अनुरोध गरेकी छिन् । श्रीमानको खोजतलासका लागि इलाका प्रहरी कार्यालय लुहाममा निवेदनसमेत दिइसकेको रूपीले बताइन् ।
दाङ तुलसिपुरस्थित गहतेमा बसोबास गर्दै आएका आफ्ना भाइ पिमलाल महताराको घरमा बास बस्न जाने र त्यहीँबाटै भाइसँग काम गर्न भारत जाने भनेर घरबाट निस्किएका चन्द्रबहादुर अहिलेसम्म घरपरिवार र आफन्तसँग सम्पर्कमा आएका छैनन् ।
‘१६ मंसिरको दिउँसो ३ बजेतिर घरपरिवारको सल्लाहबमोजिम काम गर्न जान्छु भनेर निस्कनु भयो, बेलुकी ५ बजेसम्म त्रिवेणीको टुनिबोट बजारमा छु, अब दाङ जान्छु भनेर फोन गर्नुभएको थियो,’ उनले भनिन्, ‘त्यसपछि उहाँ भाइको घरमा पनि पुग्नु भएन, अहिलेसम्म कहाँ हुनुहुन्छ भन्नेबारे केही पनि थाहा छैन ।’
आफन्तको गाउँ, घर, भारत र जान सक्ने सम्भावित सबै ठाउँमा खोजी गर्दा पनि चन्द्रबहादुरलाई फेला नपरेको उनले बताइन् । आफू र आफ्नो भाइ तुलाराम महतारा खोजी कार्यमा लागिरहेको रूपीले बताइन् । घरमा आफू, एक छोरा र एक छोरी रहेको जनाउँदै उनले कमाउन भनेर घरबाट निस्किएका श्रीमान् हराउँदा आफूहरू विचल्लीमा परेको बताइन् ।
