सुर्खेत।कालिकोट पलाँता गाउँपालिका– १ खाडा गाउँका अग्नी पीडितहरुले मुख्यमन्त्री महेन्द्रबहादुर शाहीसँग दाताले दिएको राहत नपाएको गुनासो गरेका छन् । प्रदेश सरकारले निर्माण गरेका खाँडा बस्ती हस्तान्तरणका त्यहाँ पुगेका मुख्यमन्त्री शाहीसँग स्थानीयहरुले बिभिन्न दातृ निकायले दिएको राहत नपाएको गुनासो गरेका हुन् ।
प्रदेश सरकारले २४ वटा घर पुर्ननिर्माण गरेकोमा धन्यवाद दिनुको साटो अनियमितताको आरोप लगाउँदा आफुलाई आफु निरास भएको बताए । ‘एक पोका तेल र एक पोका चाउचाउ पाएनौं भन्नुभन्दा घर बनेकोमा गर्व गर्नुहोस ।’ उनले भने,‘दाताहरुले बढी सम्पती दिएका हैनन् । दुःखमा परेका बेला सहयोग गरेका हुन् ।’
आफु खाँडा बस्तीमा आउँदा निकै खुसी लागेको तर, यहाँ आउँदा खाडाबासीहरुले निरास बनाएको बताए । ‘म अहिले लिने ठाउँमा छैन् । दिने ठाउँमा छु ।’ उनले भने,‘पलाँता गाउँपालिकामा प्रदेश सरकारले बजेट विनियोजन गरेको कति छ । त्यो हेर्नुहोस ।’
खाँडा बस्ती निर्माणमा स्थानीय सरकार र खाँडाबासीको केही विवाद भएको भए दुवै मिलेर समस्या समधान गर्न आग्रह गरे ।
‘मैले तपाईको क्या लुट्याँ ’
खाँडाबासीलाई मुख्यमन्त्री शाहीले तपाईहरुको कुनै कुरा नलुटेको जानकारी दिए । ‘मैले तपाईको मतदानमा निर्वाचन जितेको हँु ।’ उनले भने,‘भोट बाहेक तपाईहरुको के लुटे । अनि मुख्यमन्त्री विरुद्ध नाराबाजी पुत्ला दहन गर्न किन आवश्यक भयो ?’ स्थानीयहरुलाई प्रश्न गरेका थिए ।
कालिकोटको खाँडा गाउँमा २०७५ सालमा पुष ८ गते २४ घर जलेर नष्ट भएका थिए । बस्ती पुर्ननिर्माणका लागि कर्णाली प्रदेश सरकारले प्रतिपरिवार ५ लाख रुपैयाँ दिएको थियो, भने सयौ दातृ निकाय तथा व्यक्ति रुपमा लाखौ रुपैयाँ स्थानीय सरकारमार्फत हस्तान्तरण गरिएको थियो ।
दातृ निकायले दिएको रकम अहिलेसम्म पनि नपाएको स्थानीयबासीले गुनासो गर्दै आएका छन् ।
त्यस्तै, बिभिन्न आयोजनाको उद्घाटन गर्न कालिकोटमा पुगेको मुख्यमन्त्री शाहीलाई पलाँताको प्रवेशद्वारका रुपमा चिनिएको पलाँता–९, थिर्पुमा पनि बिभिन्न नारा लगाएर बिरोध गरेका थिए ।
स्थानीय सरकार र प्रदेश सरकार मिलेर भ्रष्टाचार बढेको कमिसनका आधारमा योजना वितरण हुने गरेका कारणले आफुहरुले नारा जुलुशसहित बिरोध गर्नु परेको स्थानीय देवानन्द पूर्वेले जनाए ।
मुख्यमन्त्रीलाई मतदाताको प्रश्नः ‘हाम्रो नाममा आएको राहत खोई ?’
