सल्यान ।वनगाड कुपिण्डे नगरपालिका–९ जयतपानीका बासिन्दा यसअघि बिहान उठ्न बित्तिकै पानीको जोहो गर्न हतारिन्थे। परिवारका एकजनाको काम नै पानी बोक्ने हुन्थ्यो। नजिकै खानेपानीको स्रोत नभएपछि घण्टौं पैदल र मुहानमा पालो कुर्नु उनीहरुको बाध्यता थियो।
वर्षौंदेखि खानेपानीको चरम अभाव झेल्दै आइरहेका जयतपानीबासीको सपना भने अहिले पूरा भएको छ। लिफ्ट प्रविधिबाट गाउँदेखि तलको पानी गाउँमा आएपछि उनीहरुको मुहारमा खुशी छाएको छ। आयोजना बनेपछि पानीको अभावमा वषौंदेखि काकाकुलको नियति भोग्न बाध्य जयतपानीबासीलाई ठूलो राहत मिलेको जयतपानी खानेपानी तथा सरसफाइ उपभाक्ता समितिका अध्यक्ष टेकबहादुर डाँगीले बताए। बस्तीभन्दा ५०० मिटर टाढा रहेको ठूलापोखरी मुहानबाट विद्युतीय मोटरले पानीलाई ट्यांकीमा भण्डारण गरी धारा वितरण गरिएको उनले बताए।
गाउँमा पानी आएपछि वषौंदेखि कम्मरमा बाँधेको पटुकी सुक्न पाएको स्थानीय रीता चन्दले बताइन्। उनले भनिन्, ‘वर्षौंदेखि पानी बोक्दा कपालका रौं झरेका थिए। ढिलै भए पनि अहिले घरमै पानी आएको छ धेरै खुशी छु।’
आयोजना नहुँदा एक गाग्री पानी लिन एक घण्टा टाढा जान बाध्य भएको खुमा बुढाथोकीले बताइन्। उनले भनिन्, ‘एकातिर घण्टौं पैदल हिँडेर मुहानसम्म पुगेर पनि पानीको मुहान सानो हुँदा एक दुई घण्टा लाइनमा बस्नु पथ्र्यो।’
कर्णाली प्रदेश सरकारको ४६ लाख ८१ हजार रुपैयाँ लागतमा निर्माण भएको आयोजनाबाट जयतपानीका ८६ घरधुरीभन्दा घरपरिवार लाभान्वित भएका छन्।
