काठमाडौं । नेपाल कम्युनिस्ट पार्टी (नेकपा) का वरिष्ठ नेता माधवकुमार नेपालले प्रधानमन्त्री केपी शर्मा ओलीलाई सच्याउने प्रयास विफल भएको बताएका छन् ।
प्रचण्ड-नेपाल समूहले पेरिसडाँडामा आयोजना गरेको पार्टीको प्रदेश नम्बर एकस्तरीय भेलालाई सम्बोधन गर्दै नेता नेताले ओलीको स्वेच्छाचारिताले हद पार गरेको बताएका हुन् । “हामीले सच्याउन धेरै प्रयत्न गर्यौं । धेरैपटक सल्लाह दियौं । तर, उहाँहरूले सधैँभरि गलत कुराहरूलाई मात्रै बोकेर हिँड्नुभयो । सधैँभरि निषेधको राजनीति गर्नुभयो,” नेपालले हार मान्दै भेलामा सुनाएका थिए, “उहाँले सधैँभरि पार्टीका विधि, पद्धति उलङ्घन गर्ने दिशामा मात्रै हिँड्नुभयो । सधैँभरि स्वेच्छाचारी ढङ्गले सत्ता सञ्चालन गर्ने दिशामा मात्रै हिँड्नुभयो । पार्टी छ अथवा छैन भन्ने कुराको अनुभूत नै भएन । उहाँले कुनै मतलब नै गर्नुभएन । पार्टीभित्र अरूको अस्तित्व पनि स्वीकार गर्नुभएन । मान-मर्दन गर्दै आउनुभयो । त्यसकारण यो परिस्थिति आयो ।”
प्रधानमन्त्री ओलीमा सहमति गर्ने पालना नगर्ने, निर्णय गर्ने कार्यान्वयन गर्ने कार्यशैली बसेको भन्दै यसलाई कसैगरी सच्याउन नसकेको बताएका थिए । भेलामा नेपालले भनेको एक सदस्यले उद्धृत गरे, “उहाँ जहिल्यै पनि बोल्ने तर पूरा नगर्ने, सम्पूर्ण घटनाक्रमले हामीलाई यो अवस्थामा पुर्यायो ।”
नेता नेपालले ओलीले राज्यसत्ताको चरम दुरुपयोग गरेको पनि बताएका थिए । गलत कुरालाई प्रचार गरी-गरी सत्य बनाउन लागेको पनि आरोप लगाए ।
“केपी ओलीले राज्यसत्ताको दुरूपयोग गरेर, कतिपय मिडियामा प्रायोजित समाचार छाप्ने गरिरहनुभएको छ,” उनको भनाइ उद्धृत गर्दै एक केन्द्रीय सदस्यले बाह्रखरीसँग भने, “अव्यावसायिक मिडिया खडा गरेर प्रायोजित समाचार छाप्न लगाइरहनुभएको छ । घटनालाई तोडमरोड गरेर गोयबल्स शैलीमा प्रचार गरिरहनुभएको छ । गलत कुरालाई सयपटक प्रचार गरेर सिङ्गै कम्युनिस्ट आन्दोलनलाई भ्रमित तुल्याइरहनुभएको छ ।”
भ्रमित र कलुषित तुल्याएको नेता नेपालको आरोप थियो ।
प्रचण्ड-नेपाल समूहले शुक्रबार पार्टीको जनसंगठनहरूको कार्यालयमा प्रदेश नम्बर एकस्तरीय भेलाको आयोजना गरेको थियो । भेलामा प्रदेशका जिल्ला अध्यक्ष, सचिवहरू, इन्चार्ज, सहइन्चार्जहरूलाई बोलाइएको थियो । केही दिनअघि प्रचण्ड-नेपाल समूहले नै वाग्मती प्रदेशस्तरीय सोही प्रकृतिको भेला पेरिसडाँडामै राखेको थियो ।
