काठमाडौं । सत्तारुढ दल नेपाल कम्युनिस्ट पार्टी (नेकपा)को विवादमा जहिल्यै आफ्नो अडानलाई प्राथमिकता दिने प्रधानमन्त्री एवम् अध्यक्ष केपी शर्मा ओली अब भने केही ‘लचकता’का साथ प्रस्तुत हुने अवस्थामा पुगेका छन् ।
पछिल्लो समय बद्लिएको ‘माहोल’ र आफू निकट नेताहरुको सल्लाहका कारण पनि ओली अर्का अध्यक्ष पुष्पकमल दाहाल (प्रचण्ड)सँग लचक भएर प्रस्तुत हुने अवस्थामा पुगेका हुन् ।
कात्तिक २८ गतेको सचिवालय बैठकमा प्रचण्डले १९ पन्ने ‘राजनीतिक प्रतिवेदन’ पेश गरेपछि ओली क्रुद्ध थिए । प्रचण्डको ‘प्रतिवेदन’को जवाफमा ओलीले पनि आफ्नो प्रतिवेदन सचिवालयमा पेश गरे ।
आफूविरुद्ध ‘संगीन’ आरोप लगाएका प्रचण्डलाई ‘बाइपास’ गर्न ओलीले वरिष्ठ नेता माधव कुमार नेपाल र उपाध्यक्ष वामदेव गौतमलाई ‘फकाउने’ प्रयत्न पनि गरे ।
तर, नेपाल र गौतमले अब कुनै ‘प्रलोभन र चालबाजी’मा नफस्ने बताएपछि ओलीले प्रचण्डसँगै सहकार्यको प्रस्ताव गरेका थिए ।
ओलीबाट आफूलाई ‘हदैसम्मको अपमान’ भएको उल्लेख गर्दै प्रचण्डले अब अन्य नेता (झलनाथ खनाल, माधव नेपाल, वामदेव गौतम, नारायणकाजी श्रेष्ठ)सँग मिलेर अन्तर्पार्टी संघर्षलाई निष्कर्षमा पुर्याउने बताउँदै आएका छन् ।
ओली भने जसरी भएपनि प्रचण्डलाई मनाउने प्रयासमा छन् । पछिल्लो समय संवैधानिक परिषदसम्बन्धी अध्यादेश ल्याए पछि थप चर्किएको नेकपाको आन्तरिक विवाद ओलीले स्थायी कमिटी बैठकमै फिर्ता लिने ‘बाचा’ गरेपछि केही मत्थर भएको थियो ।
तर, स्थायी कमिटीको बैठकमा गरिएको ‘बाचा’अनुसार ओलीले अध्यादेश फिर्ता लिएका छैनन् । बरु, अध्यादेश फिर्ता अगाडि आफूविरुद्ध ‘संगीन आरोप’ लगाउँदै प्रचण्डले पेश गरेको ‘राजनीतिक प्रतिवेदन’ फिर्ता गराउने दाउमा ओली छन् ।
राष्ट्रपति विद्यादेवी भण्डारीलाई समेत पुनः एकपटक विवादमा तान्ने गरी मंगलबार हतार हतार अध्यादेश ल्याएका प्रधानमन्त्री ओलीले दोस्रो दिन (बुधबार) बसेको पार्टी स्थायी कमिटी बैठकमा फिर्ता लिने ‘बाचा’ गरेका थिए । तर, उनी निकट नेताहरुले भने ‘प्रचण्ड राजनीतिक प्रतिवेदन फिर्ता लिन तयार भएपछि ओली अध्यादेश फिर्ता लिन राजी भएका हुन्’ भनेर प्रचार गरे ।
प्रधानमन्त्रीकै सचिवालयका केही सदस्यले बुधबार स्थायी कमिटी बैठक अगाडि ओली र प्रचण्डबीचको छलफलमा चार बुँदै सहमति भएको भन्दै सञ्चारकर्मीहरुलाई जानकारी गराएका थिए ।
तर, पछि स्थायी कमिटी बैठक सकिएपछि प्रवक्ता नारायणकाजी श्रेष्ठले बैठकमा २ वटा निर्णय (ओलीले अध्यादेश फिर्ता लिने र संसदको विशेष अधिवेशन माग गर्दै राष्ट्रपति कार्यालयमा बुझाउन लागिएको हस्ताक्षर फिर्ता लिने) भएको जानकारी दिए ।
स्थायी कमिटी बैठकको दोस्रो दिन (बिहीबार) मन्त्रिपरिषद बैठक समेत बस्यो । तर, त्यो बैठकमा अध्यादेश फिर्ताबारे ओलीले केही पनि बोलेनन् ।
ओलीले अध्यादेश फिर्ता लिने छाँटकाँट नेदेखाएपछि शुक्रबार कार्यकारी अध्यक्ष प्रचण्ड बालुवाटार पुगे । बालुवाटारमा ओली र प्रचण्डबीच एक्ला एक्लै छलफल पनि भयो । तर, ओलीले भने अध्यादेश फिर्ता लिन अझै केही दिन लाग्ने बताए ।
बरु, स्थायी कमिटीमा पेश भएका दुवै अध्यक्षका बेग्ला–बेग्लै प्रतिवेदन फिर्ता लिएर साझा प्रस्ताव तयार पारेर जानुपर्ने प्रस्ताव ओलीले अगाडि सारे ।
शुक्रबारको छलफलले मात्रै नपुगेर ओली शनिबार बिहानै प्रचण्डलाई भेट्न उनको निजी निवास खुमलटार पनि पुगे । खुमलटारमा पनि उनले आफूविरुद्ध गम्भीर आरोप लगाइएको ‘प्रतिवेदन’ फिर्ता लिनुपर्ने आफ्नो ‘बटमलाइन’ सुनाए । तर, प्रचण्डले कमिटीमा छलफलको विषय बनिसकेकाले अब त्यसलाई त्यत्तिकै फिर्ता लिन नहुने अडान दोहोर्याए ।
नेकपाका एक जना स्थायी कमिटी सदस्य ओली जसरी पनि प्रचण्डको राजनीतिक प्रतिवेदन फिर्ता गराउने लक्ष्यमा छन् । त्यसका लागि उनले सकेसम्म प्रचण्डलाई फकाएर आफ्नो प्रस्ताव मनाउने रणनीति लिएका ती स्थायी कमिटी सदस्य बताउँछन् ।
‘प्रचण्ड धम्की, डर र प्रलोभन भन्दा पनि उहाँको प्रशंसा गरिदियो भने छिट्टै पग्लिने नेता हो । ओलीले यसअघि सबै उपाय अपनाउनु भएकै हो । अब सायद प्रचण्डलाई फकाएर आफ्नो काम बनाउने उहाँको सोच होला,’ माधव नेपाल पक्षधर ती स्थायी कमिटी सदस्य भन्छन् ।
