रुकुम पश्चिम । गत वर्षको फागुन पहिलो सातासम्म सानीभेरी गाउँपालिकाको केन्द्र सिम्लीमा स्वास्थ्यचौकी सञ्चालनमा थियो । भाडाको घरमा सञ्चालित स्वास्थ्यचौकीलाई गाउँपालिकाले अहिले अस्पतालको रुपमा स्तरोन्नति गरी डाक्टरबाट उपचार सेवा प्रवाह गरिरहेको छ ।
रुकुम पश्चिमको सानीभेरी गाउँपालिकाले सञ्चालन गरेको अस्पताल भवन बाहिर बसेर बिरामी चेक गर्दै स्वास्थ्यकर्मी । तस्बिर : हरि गौतम/कान्तिपुर
एचएको नेतृत्वमा प्रसूति गृह सञ्चालनमा समेत समस्या भएपछि ७ नम्बर वडाको छोटेबगरमा स्वास्थ्यचौकी सारेर सिम्लीमा अस्पताल बनाइएको हो । फागुन २ गतेदेखि स्थानीयले सिम्लीबाट डाक्टरमार्फत उपचार पाइरहेका छन् । प्रसूति गृह पनि सञ्चालनमा ल्याइएको छ भने अस्पताल एकान्तमा भएकाले सबैको रोजाइमा परेको छ । अस्पताल सञ्चालनमा आएको १० महिनामा झण्डै ६ हजार जनाले उपचार सुविधा लिएका छन् । १ सय ५४ जनालाई प्रसूति सेवा दिइएको अस्पतालले जनाएको छ ।
अहिलेसम्म ५ हजार ७ सय ५७ जना बिरामीले उपचार पाएको अस्पताल व्यवस्थापक कर्णबहादुर बुढाथोकीले बताए । ‘ओपीडी, आकस्मिक, आइपीडी, ल्याब, एक्सरे, प्रसूतिलगायत सेवा चौबीसै घण्टा प्रवाह गरेका छौं,’ उनले भने, ‘फार्मेसी स्थापनाको तयारी गरिएको छ ।’ उनका अनुसार ११ वटै वडाका बिरामीलाई उपचारका लागि बाहिर जानुपर्ने बाध्यता टरेको छ । अस्पतालमा एक मेडिकल अधिकृतसहित १७ जना स्वास्थ्यकर्मीले काम गरिरहेको उनले जानकारी दिए ।
अस्पताल सञ्चालनमा आएपछि गाउँमै भरपर्दो उपचार पाइरहेको सानीभेरी गाउँपालिका–३ का डिलबहादुर विकले बताए । ‘ससाना अप्रेशनका लागि बाहिर जानुपर्ने बाध्यता हटेको छ,’ उनले भने, ‘अस्पतालमा सुरुदेखि नै डाक्टरले उपचार गर्दा मनोवैज्ञानिक रुपमा पनि बलियो भएका छौं ।’ अस्पताल व्यवस्थापक बुढाथोकीले केही अपुग भए पनि अस्पतालको सेवा प्रवाहले स्थानीयलाई सहज बनाएको बताए । उनका अनुसार अस्पतालले भवन, बिजुलीलगायतको अभाव खेपिरहेको छ ।
अस्पतालमा महिला तथा स्त्रीरोग, श्वासप्रश्वास, घाउ र चोटपटकका बिरामी धेरै आउने गरेको डा.कविन बस्नेतले बताए । स्वास्थ्य चौकीको भवन संघीय सरकारको बजेटमा बनाइएको हो । भवन निर्माण भएपछि गाउँपालिकाले उपकरण र जनशक्ति व्यवस्थापन गरी अस्पताल बनाएको थियो ।
कार्यपालिकाबाट निर्णय गराइ अस्पताल सञ्चालन गरिएको गाउँपालिका अध्यक्ष नरबहादुर पुनले बताए । ‘विद्युत्को केन्द्रीय प्रसारण लाइन जडान, फार्मेसी सञ्चालन र अस्पतालका लागि अर्को भवन निर्माणको प्रक्रियामा छौं,’ उनले भने, ‘बहुवर्षीय ठेक्काअनुसार अत्याधुनिक भवन बनाउन लागिएको हो ।’ उनका अनुसार अस्पतालको नयाँ भवन निर्माणका लागि १८ करोड रुपैयाँ संघीय सरकारले विनियोजन गरेको छ ।
