सर्लाही ।सहरी विकासमन्त्री प्रभु साह सवार गाडीले सर्लाहीमा एक पैदल यात्रीलाई ठक्कर दिएर भागेको छ ।
मन्त्री साह सवार ना १ झ ३८४२ नम्बरको जिपले हरिवनस्थित पूर्व–पश्चिम राजमार्गमा पैदल हिँड्दै गरेका लालबन्दी नगरपालिका–८ का ३० वर्षीय बच्चु तामाङलाई ठक्कर दिएको प्रहरीले जनाएको छ ।
सर्लाहीका एसपी सन्तोष राठौरका अनुसार जिपको ठक्करबाट घाइते भएका तामाङको स्वास्थ्य अवस्था सामान्य छ । उनको नमुना अस्पताल हरिवनमा उपचार भइरहेको छ । मन्त्री साह गृहजिल्ला रौतहटबाट महोत्तरीको जलेश्वरतर्फ जाँदै गर्दा दुर्घटना भएको हो ।
स्थानीय प्रत्यक्षदर्शीका अनुसार दुर्घटनालगत्तै घाइते तामाङको उद्धार गर्न लाग्दा जिप भागेको थियो । ‘घटनाबारे हामीले माथि जाहेर गरिसकेका छौँ । घाइतेको अवस्था सामान्य छ,’ एसपी राठौरले भने ।
साह सवार जिपले ठक्कर दिई घाइते भएकाको सम्पूर्ण उपचार खर्च हरिवन नगरपालिकाका मेयर गणेश प्रसाईले जिम्मा लिएका छन्।
घाइतेको हरिवनस्थित स्वाभीमान अस्पतालमा उपचार भइरहेको छ। उनको उपचार खर्च मेयर प्रसाईंले जिम्मा लिई उपचार गराइरहेका बताइएको छ। मेयर प्रसाइका अनुसार आजै साँझसम्म मन्त्री साह घाइतेको अवस्था बुझ्न हरिवन आउने भएका छन्। डाक्टरको सल्लाहअनुसार घाइतेको स्थानीयस्तरमा उपचार नभए काठमाण्डौ लानेसमेत बताए।
मन्त्री साह रौतहटको गरुडाबाट महोत्तरीको जलेश्वरतर्फ जाँदै गर्दा जिपले ठक्कर दिँदा तामाङको कम्मर र ढाडमा चोट लागेर घाइते भएको सर्लाहीका प्रहरी उपरीक्षक (एसपी) संतोष सिंह राठौरले जानकारी दिए।
