काठमाडौं । सरकारले चितवनस्थित कृषि तथा वन विज्ञान विश्वविद्यालयको उपकुलपतिमा प्रा.डा.पुण्य रेग्मीलाई नियुक्त गरेको छ । रेग्मी कर्णाली प्रदेशको योजना आयोगको उपाध्यक्ष रहेकै बेला उनलाई संंघीय सरकारले उपकुलपति नियुक्त गरेको हो ।
दैलेखका स्थायी बासिन्दा रेग्मीले दैलेखको नारायण नगरपालिकास्थित त्रिभुवन नमुना माविबाट २०३३ सालमा एसएलसी पास गरेका थिए ।
नेपालगञ्जको महेन्द्र बहुमुखी क्याम्पसबाट आइए अध्ययन गरेका रेग्मीले थाइल्याण्डबाट विद्यावारिधि गरेका थिए । उनी दरबार निकट भएकाले पञ्चायती व्यवस्थामा अवसर प्राप्त गर्ने भाग्यमानी हुन् ।
निरन्तर लाभको पदमा
शान्ति प्रक्रियासँगै उनी विभिन्न शक्तिकेन्द्र मार्फत माओवादी हेडक्वाटरसँग जोडिए । शीर्ष नेतासँग चिनजानले उनलाई नियुक्तिका लागि सजिलो बनाइ दियो ।
डा.बाबुराम भट्टराई नेतृत्वको सरकारको समयमा रेग्मी युवा तथा साना व्यवसायी स्वरोजगार कोषको कार्यकारी उपाध्यक्ष बने । स्वरोजगार कोषको कार्यकारी उपाध्यक्ष बनेको समयमा करोडौँको रकम परिचालन गरेका थिए । तर, कोषलाई उनले उत्कृष्ट बनाउन नसकेको आरोप छ ।
कोषबाट उपाध्यक्षको कार्यकाल सकिएको केही समयपछि पूर्वसभामुख कृष्णबहादुर महरा अर्थमन्त्री रहेको समयमा रेग्मीले फेरि अर्थ मन्त्रालयको आर्थिक सल्लाहकारको नियुक्ति प्राप्त गरे । कृषि अर्थशास्त्र विषयको अध्यापन गराउने उनी सबै क्षेत्रका विज्ञ बन्दै नियुक्ति लिँदै गरेको देखिन्छ ।
प्रदेश सरकार गठन भएपछि रेग्मी कर्णाली प्रदेश सरकारको विज्ञ समूहको सदस्य बने । एक वर्ष अगाडि रेग्मी कर्णाली प्रदेश सरकारको योजना आयोगको उपाध्यक्ष बने ।
कर्णाली प्रदेशको योजना आयोगको उपाध्यक्ष बनेकै समयमा उनलाई सरकारले फेरि चितवनस्थित कृषि तथा वन विज्ञान विश्वविद्यालयको उपकुलपति नियुक्त गरेको छ ।
नेमकिपाबाट माओवादी प्रवेश
पञ्चायती व्यवस्थासँग नजिक रहेर चितवनको रामपुरस्थित कृषि क्याम्पसमा झण्डै २० वर्षसम्म अध्यापन गरे । अध्यापनकै क्रममा उनी नेमकिपामा आवद्ध भए ।
२०६२/६३ को जनआन्दोलनपछि तत्कालीन विद्रोही नेकपा माओवादी शान्ति प्रक्रियामा आयो । शान्ति प्रक्रियापछि उनले पनि आफूलाई शक्तिकेन्द्रसँग नजिक बनाउन थाले ।
शान्ति प्रक्रियासँगै उनी नेमकिपा परित्याग गरेर गणतान्त्रिक मञ्चमार्फत तत्कालीन नेकपा माओवादी निकट भए । उनीसँगै प्राध्यापन गरेका एक प्राध्यापकले भने, ‘उहाँले शक्तिकेन्द्रमा रिझाउनु भयो । हामी पार्टीमा लागेकाले कहिल्यै अवसर पाएका छैनौँ । उहाँले निरन्तर नियुक्ति पाउनु भएको छ । शक्तिकै पूजा ठूलो कुरा रहेछ ।’
दैलेखमा उनलाई नजिकबाट चिन्ने व्यक्तिले पनि दैलेखमा नेमकिपाको राजनीतिमा उनी जनयुद्ध विरोधी अभियानमा सक्रिय भएको बताए । उनले भने, ‘जनयुद्धविरोधी अभियानमा सक्रिय हुने व्यक्तिले निरन्तर लाभको पद पाउने अवस्था आयो । व्यक्तिगतरुपमा उहाँ खराब त होइन, तर पार्टीमा योग्य व्यक्ति के उहाँमात्रै हो त ?’
