कैलाली । बुधबार एकै दिन कैलालीमा १५६ जनामा कोरोनासंक्रमण पुष्टि भएको छ ।
सेती प्रादेशिक अस्पतालको प्रयोगशालामा रिएको परीक्षणमा १८४ जनामा संक्रमण पुष्टि भएकामा १५६ जना कैलालीका हुन् । कैलालीको पनि सबैभन्दा बढी धनगढी उपमहानगरपालिकाको ९० जनामा संक्रमण देखिएको सेती प्रादेशिक अस्पतालका सूचना अधिकारी दिलिप श्रेष्ठले जानकारी दिए ।
त्यस्तै गोदावरी नगरपालिकाका १८ जना, भजनी नगरपालिकाका १६ जना, गौरिगंगाका १४ जना, घोडाघोडीका ९ जना, टीकापुर नगरपालिकाका ३ जना, र लम्कि चुहा का २ जनामा कोरोना संक्रमण पुष्टि भएको उनले बताए ।
कैलालीका अन्य ४ जना संक्रमितको ठेगाना खुलेको छैन । सेती अस्पतालकै प्रयोगशालामा गरिएको परीक्षणमा कञ्चनपुरका २१ जना, अछामका १ जना, बैतडीका १ जना, बझाङका ३ जना, बर्दियाका १ जना र डडेल्धुराका १ जनामा पनि कोरोना संक्रमण पुष्टि भएको छ ।
बुधबार ३८५ जनाको कोरोना परीक्षण गर्दा १८४ जनामा संक्रमण पुष्टि भएको हो । यो हाल सम्मकै सबै भन्दा ठूलो संख्या हो ।
धनगढीमा जोखिम
प्रदेशको राजधानी समेत रहेको धनगढीमा तीब्र गतिमा कोरोना संक्रमण फैलिरहेको छ । बुधबार थपिएको ९० जनासँग धनगढीमा मात्रै ८ सय जनामा कोरोना संक्रमण पुष्टि भएको छ ।
तीमध्ये २१२ जना सक्रिय संक्रमित छन् । उनीहरुमध्ये अधिकांश स्थानीय रहेको धनगढी उपमहानगरपालिका स्वास्थ्य शाखामा जनस्वास्थ्य निरीक्षक लक्ष्मीराज उपाध्यायले बताए ।
बुधबार पुष्टि भएका ९० जनामध्ये ७ जना भारतबाट आएका र अन्य सबै स्थानीय भएएको उनले जानकारी दिए ।
