सुर्खेत । बुधबार जाजरकोटमा भएको जीप दुर्घटनामा वेपत्ता भएका एक जनाको शव फेला परेको छ । जुनिचाँदे गाउँपालिकाका १७ वर्षीय लालबहादुर बुढाको शव आज भेटिएको जाजरकोट प्रहरीले जनाएको छ ।
योसँगै दुर्घटनामा मृत्यु हुनेको संख्या सात पुगेको छ । मृतक बुढाका बुवा भने घाइते छन् । उनको वीरेन्द्रनगरस्थित देउती अस्पतालमा उपचार भईरहेको जाजरकाेटका प्रमुख डिएसपी किशाेरकुमार श्रेष्ठले जानकारी दिए ।
घटना स्थलमा बुधवार नै वडा अध्यक्षसहित ६ जनाको शव भेटिएको थियो । जुनीचाँदे गाउँपालिका–११ का वडा अध्यक्ष अमरबहादुर शाही, सोही वडाका ६५ वर्षीय कृतीबहादुर शाही, जुनीचाँदे गाउँपालिका–५ की मालिका बस्नेत, सोही वडाका २८ वर्षीय कृष्ण बहादुर शाही, ३० वर्षीय खिम बहादुर शाही र छेडागाड नगरपालिका–५ का कर्ण बहादुर शाहीको बुधवार शव भेटिएको थियो ।
जाजरकाेट सदरमुकाम खलंगाबाट जुनिचाँदेकाे पराले जाँदै गरेकाे भे १ ज ९३५ नम्बरकाे जीप जुनीचाँदे गाउँपालिका-१ स्थित औलभीरमा बुधबार दिउँसाे दुर्घटना भएकाे हाे । घटना लगत्तै फरार भएका जीप चालक गोरख बस्नेतकाे खाेजी भइरहेकाे रहेकाे श्रेष्ठकाे भनाइ छ ।
