काठमाडाैं ।नेपाल कम्युनिस्ट पार्टी (नेकपा) का स्थायी कमिटी सदस्यले आगामी स्थायी कमिटी बैठकबाट नेकपाभित्रको विवाद समाधान हुने विश्वास व्यक्त गरेका छन् । पार्टीको विवाद सचिवालयमा समाधान हुन नसकी स्थायी कमिटीमा आएको भन्दै स्थायी कमिटी सदस्यको जोड पार्टी एकतालाई जोगाइ विधि, पद्धति र प्रणालीमा लैजाने रहेको बताएका छन् ।
नेकपा स्थायी कमिटी बैठक चलिरहँदा प्रधानमन्त्री केपी शर्मा ओलीले संवैधानिक परिषद्सम्बन्धी अध्यादेश ल्याएसँगै नेकपाभित्रको विवाद अझ उत्कर्षमा पुगेको छ । नेकपा स्थायी कमिटी सदस्य देवेन्द्र पौडेलले बुधबारको स्थायी कमिटी बैठकमा पनि पार्टी एकतालाई फुटबाट जोगाउँदै एकताबद्ध बनाएर लैजाने मत नै प्रमुख रूपमा आएकको बताए ।
‘सबैले पार्टी एकता जोगिनुपर्छ, पार्टीलाई विधि, पद्धति र प्रणालीमा लैजानुपर्छ । लोकतान्त्रिक मूल्य मान्यताअनुरूप संविधानमा व्यक्त भएका प्रणालीलाई संस्थागत गरिनुपर्छ । तिनलाई कमजोर हुन दिनुहुँदैन । हामीले लेखेको संविधानलाई कहीँ कसैले कतै दुरुपयोग गर्नु हुँदैन । लोकतान्त्रिक प्रणालीलाई पार्टीभित्र र बाहिर, आम राज्यमा ढिक ढंगले लागू गर्नुपर्छ भन्ने कुरा ठीक ढंगले उठ्यो’, उनले भने ।
आगामी स्थायी कमिटी बैठकमा दुवै अध्यक्षले प्रस्तुत गरेका प्रतिवेदनलाई छलफल गरी आन्तरिक समस्या हल गर्दै पार्टी र सरकारको कामलाई प्रभावकारी बनाउनुपर्नेमा केन्द्रित हुनुपर्ने उनको जोड छ । ‘अध्यक्षद्वयले संस्थागत रूपमा ल्याएको डकुमेन्ट भएकोले त्यही रूपमा ग्रहण गर्ने र त्यसलाई औपचारिक रूपमा छलफल गरी दुवैलाई सम्पत्तिका रूपमा ग्रहण गर्दै तेस्रो विकल्पमा पनि जान सक्छौँ । छलफल चाहिँ टुंगो लगाइने गरी हुनुपर्छ र हुन्छ ।’
स्थायी कमिटीले विवाद समाधानमा पहलकदमी लिनेतर्फ अघि बढेको उनको भनाइ छ । ‘सचिवालयमा समाधान हुन नसकेको विषय स्थायी कमिटीमा आएपछि हल हुने दिशातिर गयो । स्थायी कमिटी सदस्यले मेहनत गर्नुभयो । एकतालाई जोगाउनुपर्छ भनेर पहल गरेको हुँदाखेरी परिस्थिति प्रतिकूल हुनबाट रोकिएर हल हुने दिशातिर गएका छन्’, नेता पौडेल भने ।
स्थायी कमिटी सदस्य गणेश शाहले पार्टीको जारी विवादलाई अध्यक्षद्वयले मात्रै समाधान गर्न नसक्ने भन्दै स्थायी कमिटी बैठक लामो समयसम्म राखेर भए पनि समस्या समाधान गरेरै छाड्नुपर्ने बताए । फुटपरस्त गतिविधिलाई निरुत्साहित गर्नुपर्ने उनको भनाइ छ ।
‘पार्टीलाई सुदृढ बनाउनको निम्ति अध्यक्षद्वय, सचिवालय, स्थायी कमिटीका सदस्यले भूमिका खेल्नुपर्छ । यो पक्ष र त्यो पक्षमा पार्टीलाई विघटन गर्ने, फुट ल्याउने कुनै पनि गतिविधिलाई हामीले परास्त गर्नुपर्छ’ नेता शाहले भने, ‘पार्टी भित्रको समस्यालाई वार्ता संवादबाट समाधान गर्नुपर्छ । दुई अध्यक्षले मात्रै समस्याको समाधान गर्न सक्दैनन् । त्यसैले बैठकबाटै सबै समस्याको समाधान निकाल्नुपर्छ ।’
पार्टीले पहिले गरेका सबै निर्णयको इमान्दारीतापूर्वक कार्यान्वयन र छिट्टै महाधिवेशनमार्फत पार्टी नेतृत्व चयन गर्नु नै निकास रहेको उनको तर्क छ । ‘निकास भनेको हामीले गरेका सहमति, समझदारी र निर्णयको इमान्दारीतापूर्वक कार्यान्वयन नै हो । अन्तर्पार्टी निर्देशनको निर्णय कार्यान्वयन हुन सकेको छैन । एकले मुख्य रूपमा सरकार चलाउने र अर्कोले पार्टी चलाउने साथै महत्त्वपूर्ण निर्णयमा अध्यक्षद्वय र सचिवालय सदस्यलगायत छलफल, सरसल्लाह गर्ने मूल सहमति हो । अब पार्टीको विशेष महाधिवेशन गरेर निर्वाचनमार्फत नै पार्टीको नेतृत्व चयन गर्ने दिशातर्फ अघि बढ्नुपर्छ’, नेता शाहको भनाइ छ ।
नेकपा स्थायी कमिटी सदस्य अष्टलक्ष्मी शाक्यले बुधबारको स्थायी कमिटी बैठकमा पार्टीका अध्यक्षद्वयले प्रस्तुत गरेको प्रतिवेदनमा छलफल गर्ने तयारी रहे पनि अचानक अध्यादेश प्रकरण आएकोले छलफल विषयान्तर भएको बताइन् । प्रतिवेदनमाथि छलफल गरिने र आगामी बैठकपछि निचोड निकाल्ने उनको भनाइ छ ।
प्रधानमन्त्री छलफल र बैठकबाट भागेको भन्दै शाक्यले भनिन्, ‘उहाँले जे-जे भन्नुभएको भए पनि प्रतिवेदनमाथि छलफल चल्नैपर्छ । पार्टी विधि र विचार शून्य भएको छ । निष्कर्षमा पुर्याउनुपर्छ । प्रधानमन्त्री ओली छलफलबाट भाग्न पाउनुहुन्न ।’
आगामी स्थायी कमिटी बैठकपछि पार्टी विवाद समाधानको निष्कर्षमा पुग्ने र केन्द्रीय कमिटीमा लैजाने नेता शाक्यको भनाइ छ । नेकपाले स्थायी कमिटी बैठक ५ पौषमा र केन्द्रीय कमिटी बैठक १० पौषमा बोलाएको छ । शिलापत्र
