सुर्खेत ।कर्णालीका तीन जिल्लामा कोरोना संक्रमितको संख्या शून्य झरेको छ । कर्णालीका १० जिल्लामध्ये कालीकोट, रूकुमपश्चिम र मुगु जिल्लामा कोरोना संक्रमितको संख्या शून्य झरेको हो ।
यस भन्दाअघि रूकुमपश्चिमका २५५ जना, कालीकोटका ३२८ र मुगु जिल्लामा ४१ जनामा कोरोना संक्रमणको पुष्टि भएको थियो । ती जिल्लाका सबै जनामा कोरोनो संक्रमण निको भएर डिस्चार्ज भएको सामाजिक विकास मन्त्रालयले जनाएको छ ।
कर्णाली प्रदेश हाल सुर्खेतमा ९७ जना, दैलेखमा २ जना, जाजरकोटमा १४ जना, सल्यानमा ३१ जना, जुम्लामा ६ जना, हुम्लामा ११ जना र डोल्पामा ९ जना गरेर १७० कोरोनाका संक्रमित बिरामी रहेको कर्णाली प्रदेश सामाजिक विकास मन्त्रालयका स्वास्थ्य शिक्षा अधिकृत नवराज कँडेलले जानकारी दिए ।
शुक्रबार १४ जना थप कोरोना संक्रमित थपिए
कर्णाली प्रदेशमा आरटी–पीसीआर विधिबाट परीक्षण गर्दा पछिल्लो २४ घन्टामा १४ जनामा कोरोना पुष्टि भएको सामाजिक विकास मन्त्रालयले जनाएको छ ।
योसँगै कर्णालीमा कोरोना पुष्टि हुनेको संख्या ७ हजार ३५७ पुगेको सामाजिक विकास मन्त्रालयले जनाएको छ । कर्णालीमा शुक्रबार सुर्खेतका १२ जना, सल्यानका १ जना र रूकुम पश्चिमका १ एक जनामा कोरोना पुष्टि भएको हो ।
९६ हजारको कोरोना परीक्षण
हालसम्म कर्णाली प्रदेशमा आरटी–पीसीआर विधिबाट ९६ हजार १०२ कोरोना परीक्षण गरिएको सामाजिका विकास मन्त्रालयले जनाएको छ ।
हालसम्म आरटी–पिसिआर परीक्षण विधिबाट प्रदेश अस्पताल/पशुपन्छी रोग अन्वेषण प्रयोगशाला सुर्खेतमा ५० हजार २८६, कर्णाली स्वास्थ्य विज्ञान प्रतिष्ठान जुम्लामा २८ हजार १५०, दैलेख अस्पताल दैलेखमा ६ हजार ८८०, चौरजहारी नगरपालिका प्रयोगशाला रूकुम पश्चिममा १० हजार ५८८, भेरी अस्पताल बाँकेमा ५७, राप्ती स्वास्थ्य विज्ञान प्रतिष्ठान दाङमा २९, राष्ट्रिय जनस्वास्थ्य प्रयोगशाला टेकुमा १७, नेपालगञ्ज मेडिकल कलेज कोहलपुरमा २ र कमलबजार नगरपालिका प्रयोगशाला अछाममा ९३ जनाको स्वाव परीक्षण गरिएको सामाजिक विकास मन्त्रालयले जनाएको छ ।
७ हजारभन्दा बढीले जिते कोरोना
कर्णाली प्रदेशमा पछिल्लो २४ घण्टामा कोरोना संक्रमणबाट निको भई डिस्चार्ज हुनेको संख्या चार जना रहेको छन् । योसँगै कर्णाली प्रदेशमा कोरोना संक्रमण निको भएर डिस्चार्ज हुनेको संख्या ७०१८ पुगेको छ ।
कर्णालीमा २६ जनाले ज्यान गुमाए
कर्णाली प्रदेशमा हालसम्म कोरोना संक्रमणबाट २६ जनाले ज्यान गुमाएका छन् । कर्णाली प्रदेशमा सबैभन्दा बढी कोरोना संक्रमणबाट मृत्यु हुनेमा सुर्खेत जिल्ला रहेका छन् ।
सुर्खेतका १५ जना, दैलेखका ६ जना, डोल्पाका एक जना, कालीकोटका एक जना, रूकुम पश्चिमका एक जना र बाँकेका एक जनाले कोरोना संक्रमणका कारणले मृत्यु भएको छ । जसमध्ये पुरुष १८ जना र महिला आठ जना रहेको सामाजिक विकास मन्त्रालयले जनाएको छ ।
