कालिकोट । दैनिक सयौं यात्रु र मालबाहक गाडीहरु आवतजावत भैरहने कालिकोटको खाँडाचक्र नगरपालिका -८ पिलीबजार नजिकैको जोखिमयुक्त सडक सुधारमा अझैसम्म कसैको ध्यान गएको छैन ।
सुर्खेत – जुम्ला सडकखण्डको पिलीदेखि बिर्तामोड खण्डको करिब २ सय मिटर सडकखण्ड अत्यन्तै जोखिमपूर्ण रहेको छ । बिर्तामोड र पिली नजिकैको कल्याणा भन्ने ठाउँमा गाडी र मोटरसाइकल खसेर ज्यान जाने क्रम चल्न छोडेको छैन ।
अत्यन्तै जोखिमयुक्त सडकखण्ड भएको विषय सडक विभागले थाह पाएर पनि सडक स्तरोन्नतिमा लापरबाही गरेको सो सडकमा भएको घटनामा भाइ गुमाएका कलबहादुर मल्लले बताए । नेपाल कम्युनिस्ट पार्टी(नेकपा) कालिकोटका जिल्ला कमिटी सदस्य समेत रहेका मल्लका अनुसार जिम्मेवार निकायले कठिन खण्डका सडक सुधारमा ध्यान नदिदा गतवर्ष मोटरसाइकल दुर्घटना भएर पिली नजिकै कल्याणाको कच्ची सडकबाट करिब २ सय मिटर तल खसेर उहाँको भाई मनराज मल्लको ज्यान गएको थियोे ।
सो खण्डमा मोटरसाइकल र गाडी गुडाउनेहरु मात्रै होइन पैदल हिड्नेहरु समेत डराएर पैदल यात्रा गर्दै आएका छन् । दुर्घटनाको अत्यन्तै जोखिम रहेको र बारम्बार घटना भैरहेको सडक खण्ड तत्कालै सुधार गरिनुपर्ने स्थानीय मात्र नभइ सडकखण्डमा यात्रा गर्ने साह्रा यात्रुहरूको भनाइ छ । सडक खण्ड सुधारको जिम्मेवारी लिएका निर्माण व्यावसायी र सडकका खाल्डाखुल्डी पुर्ने कामदारहरुले समेत सजिलो खण्डमा मात्रै काम गरेर बिल र पारिश्रमिक भुक्तानी लिदै आएको यात्रुहरूको गुनासो छ