सुर्खेत ।मध्यपहाडी लोकमार्ग भेरी नदीमा मोटरेबल पुल निर्माण गरिएपछि कर्णाली प्रदेश राजधानी वीरेन्द्रनगरसँग रूकुमपश्चिम सडक सञ्जालबाट जाेडिएकाे छ । अब रूकुम पश्चिमका सर्वसाधरणहरूलाइ सल्यान र दाङ भएर सुर्खेत पुग्नुपर्ने बाध्यताकाे अन्त्य भएकाे हाे ।
सानीभेरी गाउँपालिका–८ र वडा नम्बर ३ काेविचमा रहेकाे भेरी नदीमा गरायला जोड्ने पुल निर्माण सम्पन्न भएसँगै सञ्चालनमा ल्याइएकाे छ । पुल निर्माणपछि वीरेन्द्रनगर पुग्न झण्डै एक सय ६८ किलोमिटर छाेटाे भएकाे छ । भेरी नदीमा पुल नहुँदा सल्यान भएर तीन सय ४० किलोमिटरको यात्रा गर्नुपर्ने बाध्यता थियो ।
पुल पाँच वर्षअघि नै निर्माण सम्पन्न भइसक्नु पर्ने पुल निर्माण कम्पनीको लापरबहाीले तीन पटकसम्म म्याद थपेर निर्माणको काम सकिएको हो । पुलले प्रदेश राजधानी सुर्खेतका साथै सानीभेरी गाउँपालिकाका ३, ४, ५ र ६ नम्बर वडासमेत जोडेको छ ।
आठबीसकोट नगरपालिका र डोल्पा जोड्ने सडकका लागि पनि यो पुल महत्वपूर्ण मानिएको छ । सिम्लीबाट यो पुल तरेर गरायलाबाट रिम्ना जाजरकोटहुँदै सुर्खेत जान सजिलो हुन्छ भने रूकुमपश्चिमका उत्तरतर्फका वडा सानीभेरी गाउँपालिकासँग जोडिएका छन् ।
पुल निर्माणको जिम्मा बीक्यु विल्डर्स, काठमाडौँले लिएको थियो । सात करोड ८२ लाख रुपैयाँको लगानीमा पुल निर्माणको काम सकिएको सडक डिभिजन कार्यालय, चौरजहारीले जनाएको छ ।
