एजेन्सी। इङ्ग्लिस प्रिमियर लिग अन्तर्गत गएराति भएको खेलमा म्यानचेस्टर युनाइटेडले सेफिल्ड युनाइटेडमाथि संघर्षपूर्ण जित निकालेको छ। ब्रामल लेन स्टेडियममा भएको खेलमा म्यानचेस्टर युनाइटेडले घरेलु टोलीमाथि ३-२ गोलअन्तरले जित निकालेको थियो।
खेलमा सेफिल्डले अग्रता बनाएको थियो। खेलको पाँचौं मिनेटमै डेभिड म्याकगोल्ड्रिक्सले घरेलु टोलीलाई अग्रता दिलाए। तर खेलको २६ औं मिनेटमा मार्कस रासफोर्डले गोल गर्दै म्यानचेस्टरलाई बराबरीमा ल्याए। त्यस्तै ३३ औं मिनेटमा एन्थोनी मार्सियलले म्यानचेस्टरलाई अग्रता दिलाउँदा पहिलो हाफमा म्यानचेस्टर युनाइटेड २-१ गोलअन्तरले अघि रह्यो।
दोस्रो हाफमा म्यानचेस्टरका लागि रासफोर्डले अर्को गोल फर्काए। उनले खेलको ५१ औं मिनेटमा मार्सियलको पासमा गोल गरेका थिए। अर्कोतर्फ खेलको ८७ औं मिनेटमा म्याकगोल्ड्रिक्सले दोस्रो गोल गर्दै घरेलु टोलीलाई खेलमा फर्काउन चाहेका थिए। यद्यपि खेलमा फर्कन त्यो पर्याप्त रहेन। र, ३-२ गोलअन्तरले म्यानचेस्टरले खेल आफ्नो पक्षमा पार्यो।
जितसँगै म्यानचेस्टर युनाइटेड १२ खेलबाट २३ अंकजोड्दै तालिकाको छैठौं स्थानमा छ। उता जारी सिजन जितबिहीन रहेको सेफिल्ड युनाइटेड १ अंकसहित तालिकाको पुछारमा छ।
