हुम्ला । हिमालपारीको गाउँ हुम्लाको लिमीका तीनवटै गाउँका बालबालिकाले पहिलोपटक खोप लगाउन पाएका छन् ।
यसअघि स्वास्थ्यकर्मी वर्षको एकपटक उपस्थिति हुने भएपछि जनशक्ति कै अभावमा लिमीका बालबालिकाले सबै प्रकारका खोप लगाउन पाउने गरेका थिएनन् ।
यो वर्ष भने नियमित रुपमा स्वास्थ्यकर्मी बस्न थालेपछि खोप सम्भव भएको हो । दुई वर्षे छोरीकी आमा छिरिङ तामाङले आफ्नो बच्चाले पहिलोपटक खोप गत असारमा लगाउन पाएको बताइन् ।
खोप सम्बन्धी कुनै जानकारी नपाएकी उनले सुरुमा स्वास्थ्यकर्मी खोप लगाउन आउँदा मानेकी थिइनन् । सबै कुरा बुझाएपछि उनले आफ्नो बच्चालाई खोप लगाउन दिएकी हुन् ।
नेपाली राम्रोसँग नबुझ्ने लिमीका बासिन्दाले स्वास्थ्यकर्मी स्वास्थ्य चौकीमा नबसेकै कारण बच्चाको खोप छुटेको पनि बताउने गरेका छन् । असारयता खोप लगाउन पाएका बालबालिकाहरु लिमीमा पहिलो खोप पाउने बालबालिका हुन् ।
लिमी स्वास्थ्य चौकीमा ११ महिनाको छोरीलाई लिएर नियमित खोप लगाउनु पुगेकी लिमीको हल्जी गाउँकी कुटी तामाङले राज्यबाट निशुल्क रुपमा आउने सेवा पहिलोपटक उपभोग गर्न पाएको बताइन् । यसअघि उनका तीन बच्चा खोप नलगाएरै हुर्केका हुन् । त्यतिबेला उनलाई नियमित खोपका बारेमा जानकारी पनि रहेनछ । हल्जी गाउँमा १९ जना बालबालिका खोप लगाउने उमेरका रहेका छन् ।
स्वास्थ्य चौकी इन्चार्ज गोर्ख भण्डारीले आफूले नियुक्ति पाए लगत्तै लिमीका गाउँमा आएर नियमित सेवा प्रवाहमा लागेको बताए । लिमीका अन्य दुई गाउँ तील र जाङमा भने नियमित खोप कार्यक्रमका बेला चार घण्टा पैदल हिँडेर घरघरमा खोप लगाउन जाने गरेको उनले बताए । तीलमा खोप लगाउने उमेरका दुई र जाङ गाउँमा सातजना बालकबालिका रहेको उनले बताए ।
यसअघि बालबालिकालाई खोप त पराको कुरा सिकिस्त बिरामी हुँदा पनि लामा बसाल्ने, चीनको ताक्लाकोट वा सदरमुकाम सिमकोटबाट परीक्षण बिनै दुखाईका आधारमा औषधि झिकाएर उपचार गर्ने गरिएको थियो ।
नाम्खा गाउँपालिकाका स्वास्थ्य शाखाको संयोजक नरबहादुर भण्डारीले लिमीमा खोप कार्यक्रम पहिलोपटक नियमित भएको स्वीकार गरे । अब यसलाई निरन्तरता दिनका लागि स्वास्थ्य शाखाले प्रयत्न गरिरहेको उनको भनाई छ । यसअघि जनशक्ति पनि कम भएको र भएकाहरुले पनि भनसुन तथा शक्तिका आधारमा स्वास्थ्य चौकीमा नजानाले खोप कार्यक्रम लिमीमा छुट्ने गरेको थियो ।