कोरोना संक्रमित उपचार प्रभावकारी बनाउन ‘कर्णाली टेलिकम्युनिकेसन’ संचालनमा

सुर्खेत । कोरोना संक्रमणका बिरामीलाई लक्षित गरेर कर्णाली प्रदेश अस्पताल सुर्खेतले ‘कर्णाली टेलिकम्युनिकेसन’ ल्याएको छ । हाल बढीजसो कोरोना संक्रमणका बिरामी होमआइसोलेसनमा बस्ने गरेका कारणले उपचारमा सहजीकरणका लागि ‘कर्णाली टेलिकम्युनिकेसन’ संचालनमा ल्याएको हो ।
‘कर्णाली टेलिकम्युनिकेसन’ सेवामा कोरोना संक्रमणका बिरामीहरुले भाइबर, फेसबुक र मोवाइलमा फोन वा म्यासेन्जर गरेर सेवा लिन र दिन सजिलो हुने ‘कर्णाली टेलिकम्युनिकेसन’का फोकलपर्सन डा.नवराज केसीले बताए । ‘कोरोना संक्रमणका बिरामीलाई लक्षित गरेर कम्युनिकेसन संचालनमा ल्याएका छौं ।’ उनले भने,‘यसमा कर्णालीभरका अन्य बिरामीले पनि सेवा लिनसक्ने छन् ।’
‘कर्णाली टेलिकम्युनिकेसन’ बिहिबारबाट २४ घण्टा संचालन हुने, कोरोना संक्रमणका जटिल प्रकार बिरामीको उपचारका लागि पूर्वतयारीमा सहज हुने डा.केसीले जानकारी दिए । ‘कोरोना संक्रमणका जटिल बिरामीलाई स्वास्थ्य परामर्श र अस्पतालमा उपचारको पूर्व तयारीका लागि यो सेवा प्रभावकारी हुनेछ ।’ उनले भने,‘केही समस्या आए अझ सुधार गरेर हामीले उपचारमा प्रभावकारी सेवा सुबिधा उपलब्ध गराउन खोजेका छौं ।’
कोरोना संक्रमणका बिरामी म्यासेन्जर र भाइबरमा भिडियो कल गरेर उनीहरुको अवस्था र बिशेषज्ञ चिकित्सकसँगको परामर्श सेवा ‘कर्णाली टेलिकम्युनिकेसन’बाट प्रदान गरिने डा.केसीले बताए ।
‘कर्णाली टेलिकम्युनिकेसन’का लागि ९८५८०२०२४६ र ९८५८०२०२४८ नम्बरको संचालनमा ल्याइएको छ ।