हुम्ला, ३ असाेज । चीन सँगको नाका ताकु लेकमा यसपाली द्विपक्षीय व्यापार व्यवसाय सञ्चालन हुन सकेन। कोरोना संक्रमणको कारण चिनियाँ सुरक्षाकर्मीले चीनका व्यापारीलाई सिमानामा आउन नदिएपछि व्यापार हुन नसकेको हो।
हुम्लाका व्यापारी र स्थानीय सबैले नेपाल र चीनको नाका सिमकोट गाउँपालिका वडा नम्बर १ को ताकु लेकमा कुनै पनि व्यापार व्यवसाय हुन नसकेको स्थानीय छिमी लामाले बताए।
सो नाकाबाट खाद्यान्न, ऊन, लत्ता कपडा, च्याङ्ग्रा लगायतका बस्तुको व्यापार हुने गरेको थियो। तर यसपाली कोरोना त्रासको कारण सिमानामा रहेको चिनियाँ सुरक्षाकर्मीले व्यापारीलाई आउन नदिएपछि व्यापार हुन नसकेको हो ।
ताकु लेकमा दुई देशका व्यापारीबिच दश करोड भन्दा बढीको व्यापार बर्सेनि हुने गरेको बताउँदै अर्का व्यापारी नरबहादुर लामाले यसपाली भने सुनसान रहेको बताए ।
नाका बन्द भएपछि धेरैको व्यापार व्यवसाय सुकेको छ । चुवा खोला क्षेत्रका खर्कमा बस्ने खर्कालाहरुले पनि रासन पानी सबै उतैको व्यापारबाट ल्याएर प्रयोग गर्ने गरेको भए पनि यसपाली उक्त क्षेत्रमा व्यापार नहुँदा घरबाटै लैजानु परेको छ।
नाका नखुलेपछि व्यापारी पनि कोही सो क्षेत्रमा नपुगेको बताउँदै लामाले यतिबेला चहल पहल निक्कै हुने सयम भए पनि खर्काला बाहेक कोही नभएको बताए।
सिमकोट र खार्पुनाथ गाउँपालिकाका स्थानीय तथा व्यापारीले स्याउ, घ्यू, उवाको सातु जस्ता सामान बिक्री गर्न पाएका छैनन्।