काठमाडौँ । ऊर्जा, जलस्रोत तथा सिँचाइमन्त्री दीपक खड्काले समयभित्र कार्यसम्पादन मूल्याङ्कन नबुझाएकाले विद्युत् प्राधिकरणका कार्यकारी निर्देशक कुलमान घिसिङलाई शून्य अंक दिनुपरेको स्पष्ट पारेका छन् । बिहीबार प्रतिनिधिसभा बैठकमा मन्त्री खड्काले समयमै कार्यसम्पादन नबुझाएकाले कुलमानले अङ्क प्राप्त गर्न नसकेको बताएका हुन् ।
उनले समयभित्र कार्यसम्पादन मूल्याङ्कन नबुझाएपछि मन्त्रालयले पत्राचार गर्दा कुलमानले आफैलाई नम्बर दिएर कार्यसम्पादन मूल्याङ्कन पठाएको तर्क गरे ।
मन्त्री खड्काले कुलमान घिसिङले सरकारलाई समेत नटेरेको भन्दै कानुनभन्दा माथि कोही हुन नसक्ने धारणा राख्नुभयो ।
आफू मन्त्रालयमा आएपछि कुलमानप्रति धेरै उत्साहित भए पनि अध्ययन गर्दै जाँदा धेरै कमजोरी देखिएको बताए । उनले प्राधिकरणले उठाउन नसकेको बक्यौतालाई आधार मानेर नाफा देखाएको तर्क गर्नुभयो ।
प्राधिकरणको सम्पत्ति तथा दायित्वको मूल्याङ्कनका लागि पटक पटक निर्णय भए पनि २५ वटाभन्दा बढी संस्थाको विवरण उपलब्ध नगराएको आरोप लगाए। मन्त्री खड्काले प्रक्रिया नै पुरा नगरी भारतसँग विद्धुत खरिदको सम्झौता गरेको जिकिर गरे ।
उनले कुलमानका कारण नभई भारतबाट सहजरुपमा विद्युत् आपूर्तिका साथै मुलुकमा विद्युत आयोजनाबाट थप विद्युत् उत्पादन भएकाले लोडसेडिङ अन्त्य भएको बताए ।
ऊर्जामन्त्री खड्काले भने- ‘३२ वर्षका ठिटाले ८९ वर्षका बाउलाई तिमी जेठा चैँ हौ, बाउ चाहिँ मै हो, त्यसैले मै चलाउँछु भनेपछि समस्या भएको मात्रै हो । म ३२ वर्षको युवा नै हो । बाउलाई सघाउँछु भनेको भए यस्तो कहाँ हुन्थ्यो होला र ? माया त छँदैछ फेरि पनि ।’
कुलमानमाथि प्रष्टीकरणबारे सांसदहरूले सोधेको प्रश्नमा जवाफ दिँदै उनले कुलमानमाथि विभिन्न आरोप लगाएका छन् । कार्यसम्पादन मूल्याङ्कनमा अटेरी गरेको, प्राधिकरणका विवरण उपलब्ध नगराएको, हुँदै नभएको नाफा देखाएको, अख्तियारी नै नलिई भारतसँग मूल्य बढाउने गरी विद्युत् खरिद बिक्री सम्झौता गरेको उनको आरोप छ ।
उनले लोडसेडिङ अन्त्य गराउँदा कुलमानले ४५० मेगावाट बिजुली भारतबाट आयात गरेको भन्दै कुलमानकै कारणले लोडसेडिङ अन्त्य नभएको समेत दाबी गरे ।