काठमाडौं। ऊर्जा, जलस्रोत तथा सिँचाइमन्त्री दीपक खड्काले लोडसेडिङ अन्त्य भारतका कारणले भएको भनेर दिएको अभिव्यक्तिप्रति नेपाल विद्युत् प्राधिकरणका कर्मचारीले विरोध जनाएका छन् ।
नेपाल विद्युत् प्राधिकरण अन्तर्गत क्रियाशील रहेका कर्मचारी कल्याण परिषद् र राष्ट्रिय कर्मचारी युनियनले बिहीबार संयुक्त रूपमा विज्ञप्ति जारी गर्दै उर्जामन्त्री खड्काको भनाइको विरोध गरेका हुन् ।
कर्मचारी संगठनहरूले सरकारको योजना, व्यवस्थापनको क्रियाशीलता, विद्युत् प्राधिकरणका कर्मचारीहरूको मेहनत र जनताको सुझबुझपूर्ण व्यवहारका कारण भएको लोडसेडिङ अन्त्यलाई नेपालको कारणले नभएको भनेर दिइएको अभिव्यक्ति सार्वभौमसत्ता सम्पन्न नेपाली जनताको अपमान भएको बताएका छन् ।
‘साथै जिम्मेवार पदाधिकारीहरूबाट व्यक्त विद्युत् प्राधिकरणको नाफा केवल कागजी नाफा हो भन्ने वक्तव्यले सिंगो विद्युत् प्राधिकरणको लेखा प्रणाली, प्राधिकरण सञ्चालक समितिबाट पास भएको वित्तीय प्रतिवेदन र महालेखापरीक्षकको प्रतिवेदनलाई समेत खण्डित गरेको छ । यस्तो झुट र भ्रामक तथ्य सम्मानित सदनमा समेत प्रस्तुत गरिनु आफैँमा दुःखदायी छ’, विज्ञप्तिमा उल्लेख छ ।
कर्मचारी संगठनहरूले मन्त्रालयबाट कर्मचारीको नामै किटान गरी सरुवा गर्नु भन्ने निर्देशन दिने जस्तो कार्यलाई समर्थन नगरेको आधारमा संस्था प्रमुखलाई हतोत्साहित गर्ने र आम कर्मचारीको मनोबल कमजोर हुने गरी पटक–पटक स्पष्टीकरण सोधेर उज्यालो समृद्ध नेपालको अभियानमा अवरोध सृजना गरेको प्रति आफूहरूको ध्यानाकर्षण भएको जनाएका छन् ।
उर्जामन्त्री दीपक खड्काले बिहीबार संसदमा नेपालको लोडसेडिङ अन्त्यको जस भारतलाई दिनुपर्ने भन्दै धारणा राखेका थिए ।
