काठमाडौँ । नवीन बस्याल, थुमराज ढुङ्गाना र पम्फा बन्जाडेको रचना तथा स्वर रहेको ‘जोगाऔँ नेपाल’ प्रगतिशील गीत विमोचन भएको छ ।
नेकपा (मसाल) का महामन्त्रीसमेत रहनुभएका प्रगतिवादी साहित्यकार मोहनविक्रम सिंहले २०८२ असोज २९ गते बुधबार आयोजित भर्चुअल कार्यक्रममाझ सो गीतको विमोचन गर्नुभएको हो ।
सो अवसरमा मन्तव्य राख्दै उहाँले प्रस्तुत गीतले अहिलेसम्म भारत र ब्रिटिसका लागि रगत बगाउने गरेकोमा अब आफ्नो देशका लागि बहादुरी देखाउनुपर्ने भाव व्यक्त गरेको बताउनुभयो ।
प्रवासी नेपालीमा देश छाड्नुपरेको पिर रहेको उल्लेख गर्दै उहाँले मुटुको एउटा कुनामा देशलाई पनि राख्नुपर्ने बताउनुभयो ।
अखिल नेपाल प्रगतिशील लेखक सङ्घ (अन्पा) का अध्यक्ष समीर सिंहले उक्त गीतको समीक्षा गर्नुभएको थियो ।
कार्यक्रमलाई अन्तर्राष्ट्रिय नेपाली एकता समाजका अध्यक्ष शक्तमान बुढाथोकी, समाजकै महासचिव खुम रायमाझी, जापान नेपाली एकता समाजका अध्यक्ष दण्ड केसी, जापान नेपाली एकता समाजकै हेमलाल गौतम, रक्तिम सांस्कृतिक अभियानका अध्यक्ष गिरीप्रसाद बुढा, मूल प्रवाह अखिल भारत नेपाली एकता समाजका अध्यक्ष प्रेम पौडेल, मूल प्रवाहकै केन्द्रीय सदस्य खिमराज चालिसे र प्रगतिशील पत्रकार सङ्घका महासचिव प्रकाश थापामगरले शुभकामना दिनुभएको थियो ।
अन्पाका उपाध्यक्ष रामदेव पाण्डेको अध्यक्षता तथा महासचिव भीष्म जोशीको सञ्चालनमा अघि बढेको सो कार्यक्रममा गीतको बारेमा सर्जकहरू थुमराज ढुङ्गाना र नवीन बस्यालले मन्तव्य राख्नुभएको थियो ।
कार्यक्रममा देश र प्रवासका विभिन्न सङ्गठनका नेता, कार्यकर्ता, दर्शक तथा स्रोताको उपस्थिति रहेको थियो ।
स्ता छन्, गीतको शब्द
विदेशी भूमि रङ्गियो सारा नेपाली रगत
अस्तित्व देशको मेटिन लाग्यो जोगाऊँ अब त
न बगाऊ विदेशमा रगत
जन्म भूमि जोगाऊँ अब त
के हेर्छौं युवा नेपाली भूमि सिमाना मिचिदा
सहन्छौँ कति मुटुझैँ प्यारो यो देश टुक्रिँदा
ब्युँझ उठ सिमाना मिचिँदा
अखण्ड यो नेपाल टुक्रिँदा
गुराँस फुल्ने पहाडी पाखा वेशीमा बुकी फूल
विलय हुन्छ नजागे नेपाल नगरौँ अब भुल
लेकमा गुराँस बेसीमा बुकी फूल
जोगाऔँ नेपाल नगरौँ अब भुल