काठमाडौं।छायाङ्कनरत फिल्म ‘होस्टल-३’को अस्ट्रेलिया र न्यूजिल्यान्डको प्रदर्शन अधिकार बिक्री भएको छ । निर्माण कम्पनीले सोमबार दुवै देशको प्रदर्शन अधिकार ब्ल्याक आइ क्रियशनलाई बेचेको जानकारी दिएको हो ।
यसअघि नै फिल्मको जापान, मलेसिया र मध्यपूर्वका देशहरूको प्रदर्शन अधिकार बिक्री भइसकेको छ । जापानका लागि यूएनए इन्टरटेन्मेन्ट र मध्यपूर्व तथा मलेसियाका लागि आशिष इन्टरटेन्मेन्टले अधिकार किनेको हो ।
नयाँ कलाकारहरूलाई लिएर यस फिल्मको निर्देशन सशान कँडेल गर्दैछन् । फिल्ममा पारस बम, रिहान गिरी, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुषलगायतका कलाकारहरूको अभिनय छ।
नयाँ नायक नायिकाहरूको जन्म गराउनेका रुपमा होस्टेल श्रृङ्खला स्थापित भएको छ । यस पटक पनि केही नायक नायिका निस्कन सक्ने अनुमानका कारण फिल्मले चर्चा बटुलेको छ ।
‘होस्टेल’बाट अनमोल केसी, सलोन बस्नेत, र प्रकृति श्रेष्ठले डेब्यू गरेका थिए । यहीबाट उनीहरु स्थापित कलाकार बने । दोस्रो श्रृङ्खला ‘होस्टेल रिटर्न्स’बाट नायिका स्वस्तिमा खड्का, नायक सुशील श्रेष्ठ, नजिर हुसेन र सुशील सिटौलालाई दर्शकमाझ परिचित गराएको थियो । दुवै श्रृङ्खला बक्स अफिसमा सफल भएका थिए ।
‘होस्टेल ३’ को स्क्रिप्ट माधव शर्माले लेखेका छन् भने कथा निर्देशक सशान कँडेलकै हो। चलचित्रलाई सम्मान इन्टरटेन्मेन्टले आरोन कन फिल्म्ससँगको सहकार्यमा निर्माण गर्दैछ।