काठमाडौं।जनता समाजवादी पार्टीका सांसद रामसहायप्रसाद यादव उपराष्ट्रपतिमा निर्वाचित भएका छन्। उनी नेपालको तेस्रो उपराष्ट्रपतिका रुपमा निर्वाचित भएका हुन्।
शुक्रबार संघीय संसद् भवन परिसरमा भएको निर्वाचनमा यादवले प्रतिद्वन्द्वीद्वय एमाले उपाध्यक्ष अष्टलक्ष्मी शाक्य र जनमत पार्टीकी ममता झालाई हराएर उपराष्ट्रपतिमा निर्वाचित भएका हुन्।
बारा २ बाट निर्वाचित प्रतिनिधिसभा सदस्यसमेत रहेका यादव जसपा संसदीय दलका नेता हुन्।
नवनिर्वाचित उपराष्ट्रपति यादवले संघीय सांसदतर्फ १८४ को मतभार १४५३६ र प्रदेशसभाको मत ३२९ को मतभार १५७९२ पाएको निर्वाचन आयोगले बताएको छ।
नेपाली कांग्रेस, माओवादी केन्द्र, एकीकृत समाजवादी लगायतका दलको समर्थन पाएका उनलाई १८४ संघीय सांसद र ३२९ प्रदेशसभा सदस्यले मत दिएका थिए ।
नेकपा एमालेकी उम्मेदवार अष्टलक्ष्मी शाक्यलाई १६९ प्रदेशसभा सदस्य र १०४ संघीय सांसदले मत दिएका छन् । उनले पाएको मतभार जम्मा १६ हजार ३२८ रह्यो ।
जनमत पार्टीकी उम्मेदवार ममता झालाई २३ संघीय सांसद र १५ प्रदेशसभा सदस्यले मत दिएका छन् । उनले पाएको मतभार कुल २ हजार ३३७ रह्यो ।
उम्मेदवारी फिर्ताको घोषणा गरेकी प्रमिला यादवलाई एक प्रदेशसभा सदस्यले भने मत दिएकी छन् ।
निर्वाचन अधिकृतको कार्यालयका अनुसार शुक्रबार संसद भवन, बानेश्वरमा भएको मतदानमा ३११ संघीय सांसद र ५१८ प्रदेशसभा सदस्यले मत दिएका थिए । चार जना प्रदेशसभा सदस्यको मत बदर भएको छ ।
उपराष्ट्रपति निर्वाचनमा संघका ३३३ संघीय सांसद र ५५० प्रदेशसभा सदस्य मतदाता छन् । र, संघीय सांसदको मतभार ७९ र प्रदेशसभा सदस्यको मतभार ४८ छ र, उपराष्ट्रपतिमा निर्वाचित हुन कुल मतभार ५२ हजार ६२८ को ५० प्रतिशतभन्दा बढी मत चाहिन्छ ।