सुर्खेत । कर्णाली प्रदेश अस्पताल र समग्र कर्णाली प्रदेशको स्वास्थ्य क्षेत्रमा सुधार ल्याउनका लागि कर्णाली प्रदेश सरकारले गठन गरेको समितिले पाँच वटा विकल्पसहितको प्रतिवेदन प्रदेश सरकारलाई बुझाएको छ । आइतबार समितिका संयोजक वरिष्ठ मुटुरोग विशेषज्ञ डा. भगवान् कोइरालाको अध्यक्षतामा गठन गरेको समितिले चार महिनाको अध्ययन र छलफलपछि तयार पारिएको प्रतिवेदन मुख्यमन्त्री यामलाल कँडेललाई बुझाएको हो ।
प्रतिवेदन बुझाउँदै समितिका संयोजक डा. कोइरालाले सुर्खेतस्थित प्रदेश अस्पताललाई प्राज्ञिक तथा शैक्षिक संस्थामा स्तरोन्नति गर्न सकिनेलगायतका पाँच वटा विकल्प दिइएको बताए । उनले प्रतिवेदनमा कर्णालीको समग्र स्वास्थ्य सेवामा सुधार ल्याउन र सुर्खेतस्थित प्रदेश अस्पताललाई स्तरोन्नति गर्न जनशक्ति, संरचना, चुनौती र अवसर समेटेर पाँच वटा विकल्प दिइएको जानकारी दिए । अन्य विकल्प भने काेरालाले सार्वजनिक गरेनन् ।
डा. कोइरालाले चार महिनाको अथक परिश्रमबाट राष्ट्रिय, अन्तर्राष्ट्रिय, प्रदेशका नीति अवलोकन गरिएको र राय सुझाव सङ्कलन गरी प्रतिवेदन तयार पारिएको बताए। प्रतिवेदनमा समावेश गरिएका पाँच वटा विकल्पमध्ये प्रदेश सरकारले आफ्नो क्षमता, बजेट अनुसार जुन सहज रूपमा कार्यान्वयन गर्न सक्छ, त्यसलाई प्राथमिकता दिन सक्ने उहाँको भनाइ छ । सुर्खेतस्थित प्रदेश अस्पताललाई शैक्षिक र प्राज्ञिक संस्थाका रूपमा स्तरोन्नति गरी अध्ययन अध्यापन गर्न सकिने सम्भावना बढी भएको काेयरालाले जानकारी दिए ।
यता प्रतिवदेन बुझ्दै मुख्यमन्त्री यामलाल कँडेलले निकै गहन अध्ययन गरेर प्रतिवेदन बुझाइएकोमा धन्यवाद ज्ञापन गरेकाछन् । साथै समितिले प्रदेश अस्पताल र समग्र कर्णाली प्रदेशको स्वास्थ्यको अवस्थामा सुधार ल्याउन दिएका विकल्प अध्ययन गरेर सबैलाई अपनत्व हुने गरी कार्यान्वयनमा लैजाने प्रतिबद्धता मुख्यमन्त्री कँडेलले जनाएकाछन् । अहिले कर्णालीको सीमित स्रोत र साधनबाट धेरै सेवा दिनु परेको भन्दै मुख्यमन्त्री कँडेलले विज्ञले तयार पारेको प्रतिवेदनलाई दिगो बनाउने गरी कार्यान्वयनमा लैजाने बताए ।
चार महिनाअघि प्रदेश सरकारले सुर्खेतस्थित प्रदेश अस्पताल र समग्र कर्णाली प्रदेशको स्वास्थ्य क्षेत्रमा सुधार ल्याउनका लागि डा. भगवान् कोइरालाको संयोजकत्वमा मितिमा पाटन एकेडेमीका डा. अर्जुन कार्की, डा. सुरेश तिवारी, प्रदेश अस्पतालका निर्देशक डा. केशर ढकाल, डा. विकास केसी र डा. नवराज केसी रहेकाे पाँच सदस्यीय अध्ययन समिति गठन गरेको थियो ।