हुम्ला।राष्ट्रिय सडक सञ्जालसँग हिमाली जिल्ला हुम्लाको सदरमुकाम सिमकोटलाई जोड्ने दशकौंदेखिको बहुप्रतीक्षित सपना आउँदो साता साकार हुँदै छ। अहिलेसम्म राष्ट्रिय सडक सञ्जालसँग नजोडिएको नेपालको एक मात्रै जिल्ला सदरमुकाम हुम्लाको सिमकोट हो। हुम्लाको खार्पुनाथ गाउँपालिका–५ स्थित खार्पु हुँदै बग्ने चुवाखोला–कर्णाली नदीमाथि नेपाली सेनाले निर्माण गरिरहेको बेलिब्रिज अन्तिम चरणमा पुगेको छ।
नेपाली सेनाले बेलिब्रिज निर्माणको ९९ प्रतिशत काम पूरा गरेको जनाएको छ। ‘केही दिनभित्रै पुल निर्माणको काम सम्पन्न हुन्छ,’ पुल निर्माण कार्यदलका प्रमुख मेजर रन्जित बुढाथोकीले भने, ‘आगामी सातादेखि बेलिब्रिज सञ्चालनमा ल्याउने लक्ष्य छ।’
यो बेलिब्रिज पुलले सदरमुकाम सिमकोटलाई मात्रै होइन, उत्तरको छिमेकी चीनलाईसमेत जोड्नेछ। कर्णाली करिडोर सिमकोट हुँदै चीनको सिमाना हिल्सासम्म पुग्छ। दक्षिणको छिमेकी भारतसँग सिमाना नजोडिएको कर्णाली प्रदेशका लागि कर्णाली करिडोर ‘भाग्यरेखा’ हो।
हुम्ला सदरमुकाम सिमकोटदेखि हिल्सासम्म नियमित यातायातका साधन चल्छन्। प्रदेश राजधानी सुर्खेतबाट खार्पु पुलसम्म पनि नियमित यातायातका साधन चल्छन्। सदरमुकाम सिमकोटदेखि हिउँ परेको समयबाहेक चीनको नाकासम्म सवारीसाधन चल्छन्। अघिल्लो वर्ष काठमाडौं हुँदै चीनको बाटोबाट ल्याइएका बस हिल्सा–सिमकोट सण्डमा सञ्चालन भइरहेका छन्। चुवाखोला–कर्णाली नदीमाथि पुल नहुँदा सदरमुकाम सिमकोट राष्ट्रिय सडक सञ्जालसँग जोडिएको छैन् भने कर्णाली करिडोरले पनि पूर्णता पाएको छैन्।
गत पुस १६ गते मन्त्रिपरिषद् बैठकले चुवाखोला–कर्णाली नदीमा बेलिब्रिज बनाउने जिम्मेवारी नेपाली सेनालाई दिने निर्णय गरेको थियो। खार्पुनाथ गाउँपालिकाका अध्यक्ष कर्णबहादुर रावलले चुवाखोलामा बेलिब्रिज बनेपछि गाडीलाई डोरीले बाँधेर नदी तार्नुपर्ने बाध्यता हट्नुका साथै कर्णाली करिडोरले पनि पूर्णता पाउने बताए।
‘यो पुल सञ्चालनमा आएसँगै भारत र चीन जोड्ने त्रिदेशीय सडकले पनि पूर्णता पाउनेछ,’ रावलले भने, ‘यो हुम्ला जिल्लासँगै सिंगो कर्णाली प्रदेशको विकासमा कोशेढुंगा बन्नेछ।’
पुल सञ्चालनमा आएसँगै तिब्बतको ताक्लाकोटदेखि भारतको रूपैडियासम्म सीधा सडक सञ्जाल जोडिनेछ। पुल बनेसँगै कर्णाली प्रदेशको आर्थिक विकासको गति पनि बढ्ने अपेक्षा स्थानीयको छ।