काठमाडौं ।आफैं तेहेरिने योजनामा रहेका नेकपा एमालेका अध्यक्ष केपी शर्मा ओलीले पार्टीको ११औँ महाधिवेशन आगामी मङ्सिर २७, २८ र २९ गते पोखरामा आयोजना गर्ने प्रस्ताव गरेका छन् ।
बुधबार एमाले केन्द्रीय कमिटी बैठकमा राजनीतिक तथा समसायिक विषय समेटिएको प्रतिवेदन पेश गर्दै उनले महाधिवेशन यही मंसिरमा गर्ने प्रस्ताव अघि सारेका हुन् ।
पूर्वप्रधानमन्त्री ओली तीन दिनसम्म चल्ने दशौँ केन्द्रीय कमिटीको बैठकमा उक्त प्रस्ताव पेश गरेपछि अब त्यसमा छलफल गरेर निर्णय गरिनेछ ।
फेसबुकमा कसैले लेख्दैमा अध्यक्ष नछाड्ने
ओलीले आफू कुनै हालतमा एमालेको नेतृत्व छाड्ने पक्षमा नरहेको बताएका छन् । उनले बुधबार सम्बोधनका क्रममा फेसबुकमा कसैले लेख्दैमा अध्यक्ष नछाड्ने बताए । बरू केन्द्रीय कमिटी र महाधिवेशनको निर्णयबाट मात्रै नेतृत्व छाड्ने अडान लिएका छन् ।
‘म कहिल्यै बिग्रिएको छैन, लहैलहैमा लागेर बिग्रेकाहरू सप्रियुन्’
अध्यक्ष केपी शर्मा ओलीले आफ्नै पार्टीका नेताहरू बिग्रिएको भन्दै प्रश्न उठाएका छन्।
उनले एमालेका नेताहरूले आफूलाई सप्रिन आग्रह गरेको बताउँदै तर आफू कहिल्यै नबिग्रिएको जिकिर गरेका छन् ।
केन्द्रीय कमिटी बैठकमा ओलीले भने, ‘केपी ओली बिग्रेको भए पो सप्रिनू । पार्टीका कुरा नगर्ने, बाहिर विरोधीको लहैलहैमा लागेर अनेक खालका हल्ला गर्नेहरू चाहिँ सप्रिनु पर्ने छ।’
ओलीले आफ्नै पार्टीका नेताहरूले अप्ठ्यारो अवस्थामा पनि सहयोग नगरेर लहैलहैमा लागेको आरोपसमेत लगाएका छन्।
उनले अहिलेको सरकार प्रतिगमनबाट बनेको जिकिर गरे । ‘प्रतिगमनबाट बनेको अवैध सरकारबाट चुनाव हुँदैन’, उनले भने, ’अहिलेको सरकारले नै चुनावको वातावरण बिगारेको छ ।’