काठमाडौं। सभामुख देवराज घिमिरेले दिएको ‘पत्रकार बिक्रीमा छन्’ भन्ने अभिव्यक्तिलाई लिएर प्रतिनिधि सभाको आइतबारको बैठकमा सांसदहरुले प्रश्न उठाएका छन्।
कांग्रेस सांसद रामहरि खतिवडाले सभामुख ‘पत्रकार बिक्रीमा छन्’ भन्ने अभिव्यक्ति दिएर चर्चामा रहेको भन्दै व्यवस्थापिकाको प्रमुखले नै यस्तो अभिव्यक्ति दिँदा प्रेस स्वतन्त्रतामाथि परेको आघातको बारेमा सोचिएको छ कि छैन? भन्ने प्रश्न गरे। ‘त्यतातिर पनि ध्यान जाओस्’, उनले भने।
नेमकिपाका सांसद प्रेम सुवालले पत्रकारहरुको बारेमा सभामुखले अध्ययन गरेरै बोलेको हुनसक्ने भन्दै छानबिन समिति नै बनाउनुपर्ने भनेर व्यंग्यमिश्रित टिप्पणी गरे। उनले सबै पत्रकार त्यस्तो नहुने पनि बताए। ‘कुन–कुन हो पीत पत्रकारिता चलाउने? कि सभामुख महोदयबाट एउटा छानबिन समिति हुनुपर्यो। कुन–कुन हो?’, उनको प्रश्न थियो।
सभामुखबाट उठेको विषय भनेको सार्वजनिक महत्त्वको हुने सुवालको भनाइ छ। ‘सभामुख महोदयले बोलिसकेपछि सार्वजनिक महत्त्वको हुन्छ। यो विषय प्रधानमन्त्रीले तत्काल छानबिन गरेर कारबाही गर्नुपर्ने हुन्छ। होइन भने अहिले यहाँ संसद्ले छानबिन समिति बनाउनु जरुरी हुन्छ’, उनले भने।
शुक्रबार सिंहदरबारस्थित आफ्नै कार्यकक्षमा नेपाल पत्रकार महासंघको प्रतिनिधिमण्डलसँगको भेटमा सभामुख घिमिरेले विवादास्पद अभिव्यक्ति दिएका थिए। त्यसप्रति आपत्ति जनाउँदै पत्रकारितासँग सम्बन्धित विभिन्न संस्थाहरुले वक्तव्य जारी गरिसकेका छन्।