सुर्खेत। कोरोनाबाट ज्यान गुमाएका कर्णाली प्रदेश अस्पताल सुर्खेतमा कार्यरत वरिष्ठ चिकित्सक डा. हरि सापकोटालाई कर्णाली प्रदेश सरकारले उच्च मूल्याङ्कन गर्दै सम्मानका लागि रिफारिस गर्ने निर्णय गरेको छ ।
कर्णाली प्रदेशका आन्तरिक मामिला तथा कानुनमन्त्री नरेश भण्डारीको अध्यक्षतामा बसेको प्रादेशिक कोभिड विपद् व्यवस्थापन समितिको बैठकले कर्णाली प्रदेशमा स्वास्थ्य क्षेत्रमा पुर् याएको योगदानको कदर गर्दै सम्मान गर्ने निर्णय गरेको हो ।
कर्णाली प्रदेशमा चिकित्सकीय सेवा पुर्याएको योगदान र कोरोना प्रकोप रोकथाम र नियन्त्रण प्रतिकार्य पुर्याएको योगदान गर्दै सम्मान गर्ने निर्णय भएको सामाजिक विकास मन्त्रालयअन्तर्गत स्वास्थ्य सेवा महाशाखा प्रमुख वृषबहादुर शाहीले बताए ।
कर्णाली प्रदेश अस्पताल सुर्खेतमा कार्यरत डा. सापकोटा ३१ भदौमा कोरोना पुष्टि भएको थियो । कोरोना पुष्टि भएपछि डा. सापकोटाको उपचार क्रममा बिहीबार भेरी अस्पताल नेपालगंजमा निधन भएको हो ।
