सुर्खेत । महाशिवरात्रि पर्व आराध्यदेव भगवान् शिवको विधिपूर्वक पूजा–आराधना गरी बिहीबार देशभर मनाइँदैछ । पशुपतिनाथ सहितका देशभरका शिवालयहरुमा शिवको पूजा आराधना गर्नेहरुको विहानैदेखि घुइँचो लागेको छ ।
शिवको पूजा आराधना गरे सुख शान्ति र परलोकमा सद्गति प्राप्त हुने धार्मिक विश्वास रहेको नेपाल पञ्चाङ्ग निर्णायक समितिका अध्यक्ष प्रा. डा. रामचन्द्र गौतमले बताए ।
यही विश्वासका साथ वैदिक सनातन हिन्दू धर्मावलम्बीले बिहानैदेखि नदी, कुण्ड र तलाउमा स्नान गरी शिवालयमा गई श्रद्धाभक्तिपूर्वक पूजा–आराधना गर्दछन् ।
व्रतमध्ये सर्वोत्तम कहलिएको महाशिवरात्रिका दिन भक्तजनले शुद्ध भई शिव मन्दिरमा पूजा–अर्चना गरी व्रत बस्ने र भगवान् शिवको प्रिय वस्तु दूध, धतुरो र बेलपत्र चढाउने गर्छन् । यस पर्वका दिन उपवास गरी रातभर जाग्राम बसे सर्वसिद्धि लाभ भई यमलोक जानु नपर्ने धार्मिक विश्वास छ । आजको दिन भगवान् महादेवलाई जाडो हुने जनविश्वासले प्रत्येक घर, चोक र मठ–मन्दिरमा दाउरा मागेर धुनी जगाई भजनकीर्तनका साथ सोही आगोमा प्रसाद बनाई ग्रहण गरिन्छ ।
राष्ट्रिय सांस्कृतिक पर्वका रूपमा रहेको यो दिन आज पशुपतिनाथमा रातको चार प्रहरमा चार प्रकारका पूजाका अतिरिक्त महादीप, अखण्डदीप, लक्ष्यबत्ती तथा दीपोत्सवका साथै लाख बेलपत्र अर्पण गरिन्छ । कैलाशकुट र किराँतेश्वरका सङ्गीत आश्रममा शास्त्रीय नाचगान गरिन्छ ।
भगवान् श्री महादेवको दर्शन गर्न र शिवरात्रि पर्वको मेला भर्न आज देशभरका विभिन्न भागलगायत छिमेकी राष्ट्र भारतका तीर्थयात्रीको पशुपतिनाथ मन्दिरमा घुइँचो लाग्छ ।
यसैबीच कर्णाली प्रदेशको राजधानी सुर्खेतको वीरेन्द्रनगर-९ लाटीकोइली स्थित ऐतिहासिक शिव मन्दिरमा यसपटकको महाशिवरात्रीमा मुख्य आर्कषण रहेको नेपालमा नै पहिलो पटक एउटै ढुंङ्गाबाट निर्मित शिवपार्वतीको अर्धनारेश्वरको मुर्ति रहेको छ । मुर्तिमा विधिवत् रुपमा प्राण प्रतिस्थापन नगरेको हुनाले अहिले केवल दर्शनकालागि मात्र खुला गरिएको मन्दिर व्यवस्थापन समितिले जनाएको छ । साथै समितिले मुर्तिमा पुजा नगरिदिन श्रद्धालुभक्तजनालाइ अनुरोध गरेको छ ।
महाशिवरात्री कै अवसरमा लाटीकोइली शिवमन्दिर परिसरमा लायन्स क्लबले निशुल्क स्वास्थ्य चेकजाँच तथा शिव शिखर बहुउद्देश्यीय सहकारी संस्थाले निशुल्क चियापान गराउने तथा पर्यटकहरुलाई निशुल्क काँक्रेविहार अवलोकन गराइने ९ नं. वडा अध्यक्ष सुरेश मानन्धरले बताए ।